19-åring frå Årdal fekk 35.000 kroner til å satsa på musikken

Årdal: Frida Hunshammer har drive med musikk lenge, og tidlegare i år gav ho ut sin fyrste singel, Lovesick. 

I sommar sa ho til Porten.no at ho ville satsa vidare med musikken, og hadde ønske om å gje ut fleire sangar. Difor valde ho å senda ein søknad om stønad til kommunen, og i førre veke vedtok formannskapet at ho skulle få heile 35.000 kroner.

– Eg er utruleg takksam for at kommunen støttar meg. Dette gjev meg moglegheit til å koma ut med meir musikk, som student hadde det ikkje vore mogleg utan stønad, seier Hunshammer oppglødd.

• Les òg: Folk i Sogn, Frida Hunshammer: – Blir meir nervøs av å ha kjente fjes i publikum

Støtte frå heimbygda

Å ha heimkommunen i ryggen betyr mykje for 19-åringen.

– Det er godt å vita at Årdal kommune har trua på meg, og vel å hjelpa meg å satsa, seier Hunshammer. 

Ordførar Arild Ingar Lægreid seier at formannskapen var positive til å hjelpa den unge musikaren:

– Det er skikkeleg flott at me har nokon som satsar på musikken på denne måten, så dette støtter me så godt me kan, seier han.