SMILER SOM EI SOL: 71° nord-programleiar Tom Stiansen seier Indre Sogn leverte godt på både vêr- og opplevingsfronten.
SMILER SOM EI SOL: 71° nord-programleiar Tom Stiansen seier Indre Sogn leverte godt på både vêr- og opplevingsfronten. (Foto: Privat)

71° nord syner fram Sogn igjen

Den siste veka har eit stort filmcrew vore å sjå i fjell og fjord i Indre Sogn. Igjen er det innspeling av programmet 71° nord, og naturen i Sogn har synt seg frå si beste side.

Indre Sogn: – Det er so mykje flott å sjå her, og me vert so godt mottekne. Difor kjem me attende år etter år.

Tom Stiansen er programleiar i det populære reality-programmet 71° nord. Gjennom tv-skjermen får tusenvis av nordmenn oppleva norsk natur på sitt beste, og i år som før går turen innom Sogn.

I mars i år gjekk kjendisutgåva av programmet på fjernsynet, og heile tre etappar var lagt til Sogn. Her skulle deltakarane mellom anna sova i hengekøye ved Vettisfossen i Årdal, 275 meter over bakken.

– Me kan ikkje fortelja noko om kva deltakarane skal gjera denne sesongen, men me kan garantera at dei også i år har fått gode naturopplevingar, seier Stiansen.

Les også: Her får fotballproffen eit luftig møte med Vettisfossen

20-års jubileum

71° nord vart for fyrste gong sendt på tv i 1999. Sesongen dei no filmar vert altso 20-årsjubileet til programmet. Me kan sikkert venta oss spanande augeblinkar, men akkurat kva konkurransar dei har filma kan me berre spekulera på.

– Eg kan i alle fall avsløra at de vil sjå mykje godt vêr frå Sogn, seier Stiansen.

FLOTTE DAGAR PÅ JOBB: Mannskapet som må til for å filma tel heile seksti. Medan dei har vore i Sogn har dei vore svært heldige med vêret. Foto: Privat
Til toppen