Leikanger: – Trass i den positive utviklinga, er eg uroa og forundra over at stadig fleire godt vaksne arbeidssøkjarar framleis står utan arbeid i trivselsfylket, seier direktør for NAV Sogn og Fjordane, Tore Thorsnes, i ei pressemelding.
Ved utgangen av september var det 847 heilt ledige i Sogn og Fjordane. Det er 25 færre enn for eitt år sidan og svarar til ein reduksjon på 3 prosent. Med ei arbeidsløyse på 1,4 prosent, har Sogn og Fjordane framleis lågast arbeidsløyse i landet saman med Oppland.
Men blant ledige over 50 er det ein auke.
– Me registrerer faktisk ein auke på 30 prosent i talet på ledige over 50 år det siste året. Dette i ein situasjon der fleire bransjar strevar med å få tak i nye medarbeidarar. Dette er kompetent og påliteleg arbeidskraft med lang erfaring. Eg oppmodar bedriftene til å sjå ein gong til på søknaden eller kontakte NAV, som kan finne godt kvalifiserte og motiverte arbeidstakarar i denne aldersgruppa, seier Thorsnes.
Positivt for dei unge
Då er naturlegvis situasjonen motsett for dei unge i Sogn og Fjordane. I september var det 83 færre ledige i aldersgruppene under 40 år, medan det var 58 fleire i aldersgruppene over 40 år.
– Det er ein klar tendens til at arbeidsløysa går ned blant yngre og aukar blant eldre arbeidstakarar. Dette har truleg samanheng med alderssamansetninga i dei bedriftene og næringane som blir råka av høgare arbeidsløyse. I tillegg satsar NAV mykje på å få yngre arbeidslause i aktivitet gjennom ulik virkemiddelbruk, fortel Thorsnes.
Elles er det reduksjon i arbeidsløysa i fire av seks kommunar i Indre Sogn. Sogndal er ein av kommunane i fylket der reduksjonen er størst med 14 færre ledige enn på same tid i fjor.
Slik ser tala ut for din kommune
| Kommune | Tal ledige | Endring tal ledige |
| Leikanger | 12 | 4 |
| Sogndal | 41 | -14 |
| Aurland | 12 | 5 |
| Lærdal | 12 | -3 |
| Årdal | 35 | -1 |
| Luster | 29 | -10 |
