PÅ TIDE: Årdal er den nest største kommunen i Sogn, har rikeleg med straum og mange som pendlar inn på arbeid kvar dag. No ser dei endeleg ut til å få på plass ladestasjonar for elbilar (Foto: Knut Opeide/Statens vegvesen.)

Årdal får hurtigladestasjonar for elbilar

Årdal Energi har søkt Enova om støtte til å byggje ladestasjon både i Øvre Årdal og på Årdalstangen for til saman 1,7 millionar kroner.

Årdal: – Vi vil sette det opp så fort som mogleg etter at vi har fått svar, seier everksjef Jørgen Luggenes i Årdal Energi.  

Enova er eit statleg føretak som gir pengar til prosjekt som tek i bruk klimavennleg teknologi. Til dei to ladestasjonane kan Årdal Energi få drahjelp tilsvarande opp til ti prosent av den totale kostnaden. Svaret er forventa å vere rett rundt hjørnet.

FORVENTAR SNARLEG SVAR: Everksjef Jørgen Luggenes i Årdal Energi.
FORVENTAR SNARLEG SVAR: Everksjef Jørgen Luggenes i Årdal Energi. Foto: Truls Grane Sylvarnes

– Det blir opp til styret å bestemme om vi kan gå vidare utan støtte, seier Luggenes. 

Årdal er den nest største kommunen i Sogn, men har til no vore dei einaste saman med Balestrand utan eit slikt tilbod.

No får dei etter alt å dømme to ladestasjonar, med støtte for både hurtiglading og vanleg styrke.

– Det er på tide. Det er eit viktig tilbod til alle som har elbilar i kommunen og til dei som er på gjennomreise, seier Luggenes.

Til toppen