Over tretti evakuerte og fire til sjukehus etter tunnelbrannen i natt

Aurland: På grunn av vedlikeholdsarbeid var det kolonnekøyring gjennom Gudvangatunnelen natt til laurdag.

Ei kolonne med tre vogntog var om lag 1500 meter inne i tunnelen då eitt av vogntoga byrja å brenna klokka 03:39. Det skriv politiet i ei pressemelding. 

• Les òg: Naudetatane: Flaks at ingen har døydd i tunnelbrann

Over 30 personar berga ut

29 arbeidarar som jobba i tunnelen, samt sjåførane av dei tre vogntoga vart evakuerte. 

– Dei har pusta inn ein del røyk og vert undersøkt av helse, seier Morten Rebnord,  operasjonsleiar i Vest politidistrikt. 

Fire personar vart køyrde til Lærdal sjukehus med mindre røykskader. 

Litt før klokka 04:54 melde politiet at brannvesenet hadde teke seg inn til vogntoget, som var utbrent. 

Klokka 05:01 melde politiet at brannvesenet hadde fått kontroll på brannen.

– Strekninga frå Gudvangsida og fram til vogntoget er no gjennomsøkt, men det er ikkje mogleg for brannvesenet å ta seg vidare mot Aurland grunna nedfall frå tunneltaket, seier Rebnord.

Statens vegvesen melder at E16 Gudvangatunnelen er stengd, og at opprydningsarbeidet vil ta ei god stund.

• Les òg: Flenjatunnelen og Gudvangatunnelen stengt grunna røykutvikling i bil