Sogndal: – Eg hadde håpa og forventa at eg skulle vinna, då er det kjekt å få det til, seier Roger Navarsete etter å ha blitt norgesmeistar i 93 kilosklassen.
Sigeren tok han med eit løft på 265 kilo.
– Eg har hatt ein tøff treningsperiode og forventa å greia omtrent den vekta eg gjorde, fortel han til Porten.no etter konkurransen.
I tillegg til Roger Navarsete var òg Fredrik Eskil Myrvang med på konkurransen, begge to løftar Sogndal IL. Myrvang sette ny personleg rekord på 180 kilo i klassen for dei under 59 kilo.
Skal representere Noreg
Dei gode resultata gjer at begge to gleda seg til ein tur til Sør-Afrika i april. Her vil det bli halde VM og begge har fått lov til å representera Noreg.
– Framover skal eg fokusera på VM i slutten av neste månad. Det blir trening og eg håpar på å få overskot.
– Eg har ikkje sett nokre spesifikke mål for konkurransen, men hadde likt å komma så nærme persen som mogleg. Det er ein gjeng som reiser ned som er like gode. Så det blir spanande å sjå kva eg får til.
