Sogndal: Marie Elisabeth Lindstrøm er salsdirektør på Quality Hotel i Sogndal. Onsdag skraut ho av faren til ein fullsett konferansesal då ferdigstillinga av utbygginga vart markert med inviterte gjester.
Etterpå gjentok ho skryten til Porten.no.
– Eg er utruleg stolt. Eg kjenner at tårene presser på, seier Lindstrøm.
Sjå bildegalleri frå opninga nedst i saka.
Ho har følgt arbeidet til faren sidan ho var lita jente, og er imponert over kva han har fått til. Med den siste utvidinga er dei no det største hotellet i fylket.
– Du skulle liksom tru at med åra så roar ein seg litt ned. Han er motsett, han berre køyrer på. Det er nesten litt vanvittig, men eg har veldig trua på at det han gjer er riktig, seier ho.
– Det er ein stor dag i dag. Det ser ut som at folk har det kjekt. Ikkje noko varmar eit hotellhjarta som det, seier hotelldirektøren sjølv, Jørgen Christian Lindstrøm.
Imponerte gjester
Trine Lerum Hjellhaug var blant dei mange gjestene som var rause med godorda på opninga.
– Det er så tøft at familien hans torer å gjera dette, det står det stor respekt av. At me no har eit topp moderne konferansehotell vil gje ringverknader i bygda, seier Lerum.
Ho var ikkje den einaste som let seg imponera.
– Det er rein galskap å løfta dette familiehotellet på den måten Jørgen Christian har gjort. Det er imponerande, og noko alle me her bør takka han for, seier Yngve Hallen.
– Det er ei kjempeflott satsing, som er utruleg viktig for heile regionen, ikkje berre Sogndal, seier Tor Arne Ness i Toyota Sogn.
Heller ikkje «konkurrenten» i Balestrand hadde noko vondt å seia om nytilskotet.
– For Sogn er dette kjempebra. Med ei så stor investering, så treng ein masse gjester. Når det er masse gjester i Sogndal, så er det masse gjester ellers i Sogn, så det er heilt perfekt, seier Sigurd Kvikne.
Ny kvardag for dei tilsette
Òg dei tilsette såg ut til å setta pris på oppgraderinga arbeidsplassen deira har fått. For dei fleste betyr det samstundes ein del nye utfordringar.
– Alt blir dobbelt så stort, seier kjøkkensjef Vidar Liljedahl, som saman med kollega Steffen Hovland fekk testa logistikken allereie på opningsdagen. Alle dei inviterte gjestene skulle nemleg få servert ein skikkeleg festmiddag.
Resepsjonist Ingrid Koren tykkjer det er inspirerande at eit hotell på bygda tør å satsa så stort.
– Eg er veldig glad for å vera ein del av det. Det er ein kjekk arbeidsplass, seier ho.
– Kor tøff er sjefen din som tør å bygga så stort?
– Han er knalltøff, men han klarer det, seier ho.
Langspurt for å bli ferdig
Dei siste vekene har entreprenørane jobba på spreng for å alt klart i tide. Sjølv på opningsdagen blanda lyden av høgfrekvente drillar seg med summinga frå gjestene som gjorde seg klare til banketten.
«Under ombygging. Ferdig kl. 18.59» stod det på skiltet møtte dei på veg inn salen med dei kvite dukane.
– Det har vore hektiske veker, men eg føler me er i mål no, og håpar folk får kost seg i kveld. Det er moro å få invitera så mange, seier Marie Elisabeth Lindstrøm.
Ho òg hadde merka seg at det ikkje berre var ho som let godt om faren denne torsdagskvelden.
– Han er ikkje så flink til å skryta av seg sjølv, men han får mange fine ord her i kveld, seier ho.
Hotelldirektøren sjølv tek skryten som ei stadfesting på at dei i det minste må ha gjort noko rett.
– Eg set stor pris på det, seier Lindstrøm.
