TIDLEG UTE: May Lene og Sonja Strupstad hadde ilag med eit tjuetals andre møtt opp litt ekstra tidleg for å sikra seg ein stol dei hadde blinka seg ut på førehand då dørene til loppemarknaden opna fredag ettermiddag. Foto: Truls Grane Sylvarnes.
TIDLEG UTE: May Lene og Sonja Strupstad hadde ilag med eit tjuetals andre møtt opp litt ekstra tidleg for å sikra seg ein stol dei hadde blinka seg ut på førehand då dørene til loppemarknaden opna fredag ettermiddag. Foto: Truls Grane Sylvarnes.

Desse møtte opp tidleg for å få dei beste loppene

Det første salet blei gjort før minuttet var gått.

Årdal: Fredag opna dørene til den årlege loppemarknaden som elevar ved studiespesialiserande på Årdal vidaregåande skule arrangerer. 

Og folk veit å gripa sjansen når skjulte skattar kan gravast fram og kjøpast for ein ganske rimeleg sum. 

Då dørene opna fredag ettermiddag, stod folk allereie då i kø for å sleppe inn. Fremst i køen stod mellom anna Sonja Strupstad og May Lene Strupstad.

– Me ville vera tidleg ute for å sikra oss ein stol som me har sett oss ut på førehand, fortel Sonja. 

Artikkelen held fram under biletet.

RASKT OPPFYLT: Slik såg det ut berre nokre minutt etter at dørene opna.
RASKT OPPFYLT: Slik såg det ut berre nokre minutt etter at dørene opna.

– Har de ambisjonar om å kjøpe noko anna?

– Ja, viss me finn noko fint, så er det fort det vert eit spontankjøp, smiler ho.

– Har alt mogleg

Ein skal ikkje seia at det var hysteriske tendensar, men det var tydeleg at folk hadde gjort førebuingane sine godt. Før minuttet var gått var første salet unnagjort. Fem minuttar seinare var loppemarknaden full av nysgjerrige folk på jakt etter ein skjult skatt.

Artikkelen held fram under biletet.

RASKT SAK: Før minuttet var gått var første salet unnagjort. Ingrid Aafedt Bukve og Camilla Semstrøm Nundal hadde kontroll på pengane.
RASKT SAK: Før minuttet var gått var første salet unnagjort. Ingrid Aafedt Bukve og Camilla Semstrøm Nundal hadde kontroll på pengane.

– Det er heilt supert, det likar me, gliser Ingrid Aafedt Bukve og Camilla Semstrøm Nundal, som manøvrerer kortterminalen og har styr på pengane.

– Her er det alt mogleg, alt frå møblar, glas, servise, barneleiker, bøker og filmar, fortel Nundal.

Pengane går til skuletur

Pengane dei får inn skal dei bruke på skuletur til våren. Då skal klassen til Berlin, og på turen lærer dei mellom anna om kva som skjedde under 2. verdskrig. Etter fleire veker med førebuingar, er det godt å kome i gong.

– Målet vårt er 80.000 kroner. I fjor fekk dei inn over 100.000, men då var det vel rekord også. Me skal gjera vårt beste for å slå dei, seier Aafedt Bukve. 

Til toppen