NY MED NÝR: Rullekaka blir spennande med Nýr-ost og solbærkompott. Foto: Carl Martin Nordby.
NY MED NÝR: Rullekaka blir spennande med Nýr-ost og solbærkompott. Foto: Carl Martin Nordby.

Dessertlykke på rull

Er rullekaka ein norsk tiramisu eller ei blautkake i sylinderform? Eit smaksmessig lykketreff er ho i alle fall.

Eit mjukt bakverk med krem og litt fruktig – det er ein grunnformel som alltid funkar. I denne haustlege, fyldige, søte og friske dessertbomba speler solbær og fersk-osten Nýr hovudrollene.

DEIG: Blir stroken utover smurt bakepapir eller ei silikonmatte.
DEIG: Blir stroken utover smurt bakepapir eller ei silikonmatte.

Nýr-osten blir laga på ein økologisk gard på Auli av ein bonde som behandlar kyra sine ekstra godt. Mellom anna får kalvane gå saman med kua. Mjølka blir ysta og syrna i garsdmeieriet til ein kritkvit ferskost, som går til butikkar og restaurantar over heile landet. Nýr er fyldig, har lite feitt og mykje protein og ikkje minst syre. Kombinasjonen av lågt feittinnhald og det syrlege gjer denne rullekaka til ein god dessert som hadde vorte i søtaste laget med vanleg krem.

I solbær er det ein del naturleg pektin som får kompotten til å tjukne litt, men for at bæra ikkje skal renne ut av kaka, koker vi dei saman med stivelsen Certo. Når kompotten blir kald, stivnar han enda meir.

Det å koke bær gjer som regel at den friske smaken forsvinn, men solbæra er skikkeleg hardføre og held på både den nydelege fargen og smaken, sjølv etter ein halvtimes koking. Det speler heller inga rolle om solbæra i kompotten har vore ein tur i frysaren først. Eg siler ikkje bæra ut av kompotten, for dei har ein delikat og mjuk konsistens etter kokinga.

Som saus til rullekaka vel eg ein fyldig, litt bitter karamellsaus med sjokolade, ei klype salt og litt balsamicoeddik. Kor bitter sausen skal vere, kjem an på kor mørk karamellen er når ein har i væska. Balsamicoen gir sausen eit hint av noko friskt, mens supersjokoladen frå Valrhona gjer sausen fyldig og gir ein ekstra dimensjon til smaken.

Framgangsmåte

Solbærkompott: Bland alle ingrediensane i ein stålkjele og kok dette på moderat varme i minst 20 minutt. Rør med ei tresleiv i ny og ne. Kjøl ned kompotten før du stryk han utover på kakebotnen.

Artikkelen held fram under biletet.

FYLL: Solbærkompott og Nýr på den steikte kaka.
FYLL: Solbærkompott og Nýr på den steikte kaka.

Rullekake: Visp egg og sukker luftig. Rør inn mjøl, bakepulver og Nýr. Stryk deigen utover smurt bakepapir eller silikonmatte og steik han på 180 grader til han er heva over det heile og stiv. Fargen treng ikkje vere mørk over heile flata. Ta bakverket ut og kjøl det ned i 2 minutt før du legg over plastfolie og kjøler det vidare ned til 40 grader. På denne måten held kaka seg fuktig, mjuk og smidig til rullingsen skal starte. Riv skalet av ein halv sitron og bland det godt med sukkeret, gjerne med fingrane eller oppi ein mortar.

Dryss det lysegule sukkeret utover eit bakepapir, og legg kaka snudd oppå. Dra deretter av bakepapiret du steikte kaka på. Hell solbærkompotten på kaka og smør han utover til du har eit cirka 5 millimeter tjukt lag over heile flata. Legg nokre skeier med Nýr her og der, og bland osten litt med kompotten. Rull saman kaka på langs til ein fast rull ved hjelp av bakepapiret som ligg under.

La kaka trekkje / setje seg i 30 minutt i kjøleskap før du deler henne opp. Topp gjerne kaka med meir kompott og Nýr.

Artikkelen held fram under biletet.

OPPDELING: La kaka «setje seg» 30 minutt i kjøleskapet først.
OPPDELING: La kaka «setje seg» 30 minutt i kjøleskapet først.

Karamellsaus: Varm sukkeret i ein kjele til det byrjar å smelte. Ikkje rør i karamellen med kjøkkenreiskap, da klumpar han seg, og desse klumpane er vanskelege å bli kvitt. Først blir sukkeret til ein lys karamell, som skal koke vidare til han blir mørk og fin, men utan at han svir seg. Trekk kjelen til side og hell over 0,5 desiliter vatn. Ikkje rør i kjelen, berre la vatnet koke seg godt inn i karamellen. Ha no i balsamocoeddiken og den hakka sjokoladen, kok opp og tilsett fløyten. La sausen koke ned på moderat varme, gjerne under lett visping av og til, til han blir blank og fyldig. Rør inn ein klype eller to med salt til slutt. (©NPK)

Til toppen