Dette er ekte handballglede

Søndag var 8 og 9-åringar frå heile Indre Sogn samla i Tangehallen. 

Årdalstangen: Søndag var det nemleg mini-handballturnering, som Årdalstangen IL arrangerte med lag frå Aurland, Jotun, ÅTIL, Syril og Bjørn. 

Fordelt på tre baner i Tangenhallen var dei unge i full sving med å sentre, kaste, score mål og juble. Tidlegare er dette noko idrettslaga i Årdal, Lærdal og Aurland har bytt på å arrangere, men no har regionen gått inn og teke styringa, fortel leiar for handballen ÅTIL, Anne Kauppi.

Etter planen skulle 7- og 8-åringane spele i Aurland laurdag, men sidan det var så få påmelde, vart den avlyst. Difor var det også nokre 8-åringar med på Årdalstangen.

– Her spelar dei på ei lita bane, og då er tanken at keeper får vere med i angrep og kan score mål slik at angripande lag alltid er i overtal med fire mot tre. Det er for at det skal vere målsjansar i kampane, forklarar Kauppi. 

– Dessutan er det eit poeng at det skal vere mange ballbehandlingar per spelar, og når dei er færre på bana, så er det fleire som får vere borti ballen. 

I nesten fem timar heldt dei på søndag. Med hjelp frå unge, ferske dommarar frå dei lokale klubbane, vert dei yngste losa fint gjennom kampane. 

Til toppen