PÅ TOPP: Anders Seim jr. frå Årdal er ny konsernsjef i HMR-konsernet. Arkivfoto 
PÅ TOPP: Anders Seim jr. frå Årdal er ny konsernsjef i HMR-konsernet. Arkivfoto 

– Ei tillitserklæring eg audmjukt tek i mot

Anders Seim jr. frå Årdal blir ny konsernsjef i HMR-konsernet.

Årdal: –  Det er ei stor utfordring, og eg har tenkt mange tankar kring å vidareføra eit konsern som HMR. Det er ei historie som har gått veldig bra, og eg skal gjera mitt for å vidareføra dette, seier Seim jr. til Porten.no.

Ei pressemelding frå HMR fortel at årdølen tek over for Knut Prestnes. Seim jr. fortel han har jobba tett på Prestnes lenge.

– Eg har jobba i HMR-konsernet i 27 år, og vore tett på konsernsjefen fram til i dag. Så eg fekk spørsmål om å ta denne oppgåva vidare; ei tillitserklæring som eg audmjukt tek i mot.

Vil først skaffa seg fullt oversyn

Han går frå stillinga som dagleg leiar i HMR Hydeq AS, ei stilling han har hatt sidan 2000. Tidlegare hadde Seim jr. også fleire ulike roller i konsernet.

– No skal eg skaffa meg fullt oversyn over konsernet som heilskap og trygga det som er etablert i første omgang. Så kan ein sjå på moglegheita for at me kan utvikla oss enno meir vidare, til dømes finna nye marknadssegment, seier Seim jr.

HMR-konsernet har seks dotterselskap og leverer hovudsakleg tenester og løysingar til prosess-,  energi-, olje- og gassindustrien.

Hovudkontoret ligg på Husnes i Kvinnherad i Hordaland.

– Det vil bli mykje vekependling, men ein del kan eg gjera frå Årdal også. Det er viktig å vera der det skjer når ein er konsernsjef. Me har avdelingar på Voss, Sunndalsøra og i Bergen også, så det blir ein del reising.

Til toppen