MED BAND: Trompetist Nils Petter Molvær (til venstre) tek med seg resten av bandet då han kjem til Sogndal i februar.
MED BAND: Trompetist Nils Petter Molvær (til venstre) tek med seg resten av bandet då han kjem til Sogndal i februar. (Johannes Lovund)

Ein av dei største jazzartistane i landet kjem til Sogndal og Blaoboxen

– Det syner at konsertscena er i ferd med å etablera seg på nasjonalt nivå og bli ein naturleg stoppestad for norske artistar i toppklassen.

Sogndal: Konsertscena Blaoboxen i kulturhuset i Sogndal har spikra programmet for vinteren og våren. Det største namnet på plakaten er trompetisten Nils Petter Molvær, ein av landets aller største jazzartistar

– Me er ekstremt godt nøgde med programmet me har sett opp. At artistar av Nils Petter Molvær sitt kaliber no legg ruta innom Sogndal og Blaoboxen, syner at konsertscena er i ferd med å etablera seg på nasjonalt nivå og bli ein naturleg stoppestad for norske artistar i toppklassen, seier Håvard Ese Eliassen i Blaoboxen i ei pressemelding.

PLATEAKTUELL: Natalie Sandtorv gav ut si andre plate i år. 
PLATEAKTUELL: Natalie Sandtorv gav ut si andre plate i år.  Bilde: Kristin Støylen

Jazz for massane

Molvær kjem til Sogndal i februar og har med seg Geir Sundstøl på gitar, Erland Dahlen på trommer og skipsklokker og Jo Berger Myhre på bass.

Molvær er kanskje mest kjent for å blanda jazz og elektronisk musikk. Slik har han bygd opp ei tilhengarskare som går langt utover det tradisjonelle jazzpublikummet. I 1998 gav han ut Khmer, eit album som solgte 250 000 eksemplar på verdsbasis. I fjor kom Boyancy, plate nummer ni i rekka, og for den vann han spellemannsprisen i jazzkategorien.

Dei to andre artistane som er stadfesta denne vinteren er Darling West og Natalie Sandtorv:

VILL VEST: Darling West er countryalibiet denne konsertvinteren.
VILL VEST: Darling West er countryalibiet denne konsertvinteren.

To ferske namn på veg opp

Darling West er ferskingar på den norske countryscena, men har allereie rokke å få spellemannspris for andreplata Vinyl and a Heartache. I mars 2018 kjem oppfølgaren og Sogndal er ein av stoppestadane når gruppa legg ut på norgesturnè same månad.

– Konserten vert eit absolutt must for alle som elskar bra country, står det i pressemeldinga.

Natalie Sandtorv vart kåra til årets talent under Moldejazz i 2016. Hennar andre soloplate,  Freedom Nation, kom i 2017. Når ho kjem til bygda i april blir det med fullt band.

– Ein konsert du seint vil gløyma, lover arrangørane. 

Datoane blir slik:

  • 6. februar - Nils Petter Molvær
  • 14. mars - Darling West
  • 19. april - Natalie Sandtorv
Til toppen