NYTT KAPITTEL: Etter fem år i Årdal og IL Jotun er Olafur Sveinsson klar for eit nytt kapittel i trenarkarriera. (Bilde: Truls Grane Sylvarnes)

Etter fem år er det slutt. No er «Olli» klar for ny klubb

Olafur Sveinsson tar farvel med handballen i Årdal for andre gong.

Årdal: Etter fem år er islendingen klar for nye oppgåver på sidelinja. Etter fem år som trenar for Jotun, deretter Jotun/Årdalstangen, skal Sveinsson leie Stryn sitt herrelag i 2. divisjon.

– Eg har fått førespurnader frå fleire klubbar, men dette var det tredje året på rad at Stryn tok kontakt. Dei to andre åra har det ikkje blitt noko av først og fremst fordi eg har hatt ein bindande kontrakt med Jotun, men no er den ferdig. Då er det eigentleg tid for å lea litt på seg og sjå om ikkje ein kan gå opp eit hakk og utvikle seg sjølv, seier Sveinsson.

Den islandske trenaren, som har vore trenar i Jotun i to vender, har allereie byrja i ny jobb og flytta til Stryn. Bak seg legg han eit lag som på få år har gått frå å kjempe om opprykk til 1. divisjon til å spele 4. divisjonshandball.

UTANFOR BANA: Perioden har blitt prega av konfliktar utanfor bana. I hans tredje sesong slutta tre av spelarane i protest.
UTANFOR BANA: Perioden har blitt prega av konfliktar utanfor bana. I hans tredje sesong slutta tre av spelarane i protest. Foto: Truls Grane Sylvarnes

Utanomsportsleg fokus

Sportsleg har pilene peikt i feil retning, men også utanfor parketten har det ikkje alltid vore så greitt. 

– Heilt sidan eg kom i 2012 har spelarstallen vore tynn med rundt elleve spelarar. Det skuldast at arbeidet som vert gjort innanfor rekruttering rett og slett ikkje er godt nok. Så veit alle at det oppstod ein del spetakkel i den tredje sesongen, seier han og siktar til episoden der tre av nøkkelspelarane slutta i protest mot Sveinsson.

– Etter den episoden var det fritt fall, legg han til.

Førre sesong starta det «nye» unge laget godt, men mot avdelingas beste lag, Sogndal, sleit dei, og til slutt vart det ein 2. plass. 4. divisjon er uvant kost for ei handballbygd som Årdal.

– Når det er sagt, så har det sikkert aldri vore så gøy med handballen som dei siste to åra med fred og ro, og der spelargruppa har vore nøgde med opplegget, seier islendingen.

AMBISJONAR: Sveinsson har aldri lagt skjul på at han meiner rekrutteringsarbeidet er for dårleg at det må gjerast grep dersom handballen i bygda skal oppleve ei ny storheitstid.
AMBISJONAR: Sveinsson har aldri lagt skjul på at han meiner rekrutteringsarbeidet er for dårleg at det må gjerast grep dersom handballen i bygda skal oppleve ei ny storheitstid. Foto: Truls Grane Sylvarnes

Etterlyser ambisjonar

Også han tykkjer det er trist at handballen i bygda har enda opp der han er no.

– Hovudpoenget er at det må vera trenarar som er engasjerte i akkurat den idretten og har ambisjonar om å oppnå noko innanfor handballen, ikkje berre for eigen unge eller aktivitet. Frå min ståstad er det meiningslaust å drive med ein idrett dersom ein ikkje vil oppnå resultat og bli ein god utøvar. 

– Alle veit at det er foreldre som trenar ungane på frivillig basis. Det er og blir ein diskusjon her i Noreg. Eg meiner Noreg bør ut av den frivillige ordningar dersom ein skal oppnå noko, seier han.

Takkar for seg

Sveinsson seier han er letta over at han no får prøve seg i ein ny klubb og takkar for tida han har hatt i Årdal.

– Eg må nemne nokre personar særleg. Gunn Lerøy som eg skuldar alt det beste i verda. Terje Sylvarnes som assistent og ven, og ikkje minst Reidun Myrland, Arne Håkon Laberg og Alf Roger Lereng som har støtta meg.

NVE: Meir regnflaum framover

Ifølgje Noregs vassdrags- og energidirektorat (NVE) vil det bli mellom 20 og 40 prosent auke i flaumvassføringa i fleire vassdrag dei neste 100 åra.

Til toppen