KJEKK DAG: Snøskuterkøyringa var ein populær post på programmet, òg for familien Malmanger Svedal. Frå venstre: Olaus Malmanger Svedal (5), Hans Mark Svedal, Kari Malmanger og Bjørnar Malmanger Svedal (3). (Foto: Halvor Farsund Storvik)
STILTE OPP: Røde Kors i Sogndal var blant dei mange frivillige som stilte opp for å gje kreftsjuke ungar og familiane deira ei draumehelg. (Foto: Halvor Farsund Storvik)
SAMAN I SORGA: Selma Nathalie (16) og Maria Madelaine Contreras Halvorsen (15) frå Bergen mista veslesøstra til kreftsjukdom. Dei tykkjer det er godt å treffa andre som er i ein liknande situasjon. (Foto: Halvor Farsund Storvik)
FREKK: I Hodlekve var det nok av aktivitetar og dyr å kosa seg med. Desse to esla var blant dei meir rampete innslaga. (Foto: Halvor Farsund Storvik)
PÅ HESTERYGGEN: Når du kjem frå Bergen er det ikkje kvar dag du får sitta på hesteryggen. (Foto: Halvor Farsund Storvik)
INNHALDSRIK DAG: Vegard Skjeldestad har sjølv hatt kreft, og veit kor mykje slike aktivitetshelgar kan bety for ein familie som har det tøft. I helga fekk han sjansen til å dela gleda vidare. (Foto: Halvor Farsund Storvik)
FARTSFYLT: Det gjekk unna då snøskutarane sette avgarde i Hodlekve. Ungane i lasteplanet ville derimot ha enno meir fart. (Foto: Halvor Farsund Storvik)

Familien frå Sogndal fekk ein velkomen pustepause frå kreftbehandlinga

– Me opplever mykje støtte i kvarandre.

Sogndal: I helga var over seksti familiar samla i Sogndal for å få ein velfortent pustepause frå kreftsjukdommen. Blant dei var ein familie frå nettopp Sogndal.

 – Når du er i ein litt vanskeleg situasjon, er det alltid godt å vita at det er andre som strevar med det same. Me opplever mykje støtte i kvarandre. Og så er det kjekt å berre slappa av og vera sosial, me får bygga oss opp litt, seier Kari Malmanger.

RØRT: Initiativtakar Vegard Skjeldestad vert rørt av å sjå at ungar med kreftsjukdom likevel kan utstråla så mykje glede. Foto: Halvor Farsund Storvik

Helg rik på aktivitetar

Sonen Olaus (5) blir behandla for akutt lymfatisk leukemi, ei form for kreft som angriper stamcellene i beinmargen.

– No er me ferdige med to år, og har eit knapt halvår igjen. No er han frisk og rask eigentleg, seier Malmanger.

Laurdagen var dei og resten av familiane på ein gard i Hodlekve, der dei fekk sitta på med snøskuter, ri på hest og klappa dyra som var der. Tidlegare på dagen hadde dei vore på besøk til brannstasjonen i Sogndal.

– Det er veldig kjekt at det er nokon som lagar til slike ting, seier Malmanger.

– Veit ho har det bra

Søstrene Selma Nathalie og Maria Madelaine Contreras Halvorsen kom heilt frå Bergen. Dei sette pris på det sjeldne gardsbesøket og sjansen til å ri på hest. 

SAMAN I SORGA: Selma Nathalie (16) og Maria Madelaine Contreras Halvorsen (15) frå Bergen mista veslesøstra til kreftsjukdom. Dei tykkjer det er godt å treffa andre som er i ein liknande situasjon. Foto: Halvor Farsund Storvik

Ingen av dei har kreft sjølve, men for ikkje lenge sidan mista dei veslesøstra til sjukdomen.

– Eg synst det er koseleg å berre vita at me ikkje er åleine. Det er andre som har vore gjennom det same og det gir støtte, seier Selma.

Dei opplever at folk rundt dei og på skulen heime i Bergen har vore flinke til å støtta dei. Samstundes kan det for enkelte vera skummelt å nemna sjukdomen.

Sjølve finn dei trøst i overnaturlege krefter.

– Eg veit ho er på ein bra plass. Me er kristne, så me trur jo at me vil sjå ho igjen i himmelen og me veit ho har det bra, seier Maria.

Rørt initiativtakar

Initiativtakar Vegard Skjeldestad var eit einaste stort smil der han gjekk blant leikande og smilande ungar. Sist sommar sykla han og seksten venner Jotunheimen Rundt for å samla inn pengar til nettopp ei slik aktivitetshelg.

Han tykkjer det er fantastisk å sjå gleda hos familiar som til tider har hatt tøffe stunder. 

– Fredag, då alle kom på hotellet, så sat eg der med ein klump i halsen. Ungane sprang rundt og hadde det kjempekjekt. Nokre av dei er skikkeleg sjuke, men dei lyser opp heile omgjevnaden. Det er heilt utruleg, seier han.

FESTMIDDAG: Laurdag kveld var heile gjengen, inkludert deltakarane i Vegards krefttråkk, samla til felles middag på hotellet.  Foto: Ingrid Skartun
Til toppen