Aurland: For andre året på rad har Flåm AS fått utmerkinga gasellebedrift.
– Æra går til alle tilsette i Flåm-klynga, som har stått på for å skapa eineståande resultat, og til lokalbefolkninga som har støtta oss og bidrege til å gjera Aurland til eit attraktivt reisemål, seier Solrun Hjelleflat, konsernsjef i Aurland Ressursutvikling og dagleg leiar i Flåm AS i ei pressemelding.
Aurland Ressursutvikling og Flåm AS
- Flåm AS er eit dotterselskap av Aurland Ressursutvikling, og er eigd av Aurland Kommune, SIVA Eigedom Holding AS og Aurland Sparebank.
- The Fjords er eit fellesføretak eigd av Aurland Ressursutvikling og Fjord 1.
- Flåm Utvikling (Flåmsbana) er eit fellesføreteak eigd av Aurland Ressursutvikling og NSB.
- Flåm Hotell er heileigd av Aurland Ressursutvikling.
- Myrkdalen Fjellandsby er 20 prosent eigd av Aurland Ressursutviling.
Kvart år lagar Dagens Næringsliv ei liste over dei mest framgansrike verksemdene i landet. Kravet for å kalla deg ei gaselle er at verksemda minst må ha dobla omsetnaden på fire år og ho må tena pengar.
- Sjekk fjorårslista: Dette er dei beste og raskast veksande bedriftene i Sogn
Millionku for kommunen
Flåm AS hadde i fjor driftsinntekter på 170 millionar kroner, ein vekst på over 20 prosent. Dei siste fire åra har driftsinntektene auka med 128 prosent, godt over kravet til dobling. I 2017 var overskotet på drifta på 32 millioner kroner, ei auke på 74 prosent frå året før. Av overskotet fekk eigarane eit utbyte på 20 millionar.
– At ein stor del av overskotet går tilbake til kommunen er ekstra hyggeleg, seier konsernsjef Hjelleflat.
Sidan 2009 har Aurland Ressursutvikling, som eig Flåm AS, betalt ut 68 millionar kroner i utbyte. Av dette har 27 millionar gått til Aurland kommune, som eig 40 prosent av aksjane.
