REISTE BUST: Glenn Tony Lie sin katt (til høgre), tykte først ikkje mykje om å få ein ny gjest i huset. 
REISTE BUST: Glenn Tony Lie sin katt (til høgre), tykte først ikkje mykje om å få ein ny gjest i huset. 

Glenn Tony tok med seg feil katt heim, no treng han hjelp: – Er prikkande like

– Eg trudde rett og slett det var min katt, seier Glenn Tony Lie, som no ønskjer hjelp til å finne den eigentlege eigaren.

Glenn Tony Lie bur i Øvre Årdal, men var i Lærdal då tekstmeldingane byrja å tikke inn. Nokon hadde funne ein katt på ein italiensk restaurant og den var mistenkjeleg lik hans eigen.

HAR FUNNE TONEN: Dei to kattane har blitt betre vener etter det noko anstrengte første møtet. 
HAR FUNNE TONEN: Dei to kattane har blitt betre vener etter det noko anstrengte første møtet. 

– Eg reiste ned og henta han, for eg trudde det var min. Så eg sit no her med to kattar, seier Lie.

Han kan knapt skuldast for å ha tatt feil. Dei to kattane er nesten identiske.

– Når eg ser dei i lag er einaste forskjellen at den her er ørlite større. Ellers er dei prikkande like, seier Lie.

Originalen likte ikkje heilt å få ein ny gjest i huset, så stemninga var temmeleg trykka i byrjinga. Men det var ikkje det einaste den nye katten hadde å stri med.

– Det verkar som han er lettare sjokka. Skjorene har hakka litt på den og det verkar som den har litt ilt i den eine hofta, seier Lie.

Difor håpar han at den faktiske eigaren skal melde seg, slik at historia får ein lukkeleg slutt. 

–​ Eg har nok med èin katt, seier Glenn Tony.

Oppdatering: Det gjekk ikkje mange timane frå saka var ute, til vi fekk vite at katten hadde kome heim til sin rettmessige eigar.

 

Til toppen