MAT FOR ALLE: At fiskegratengen er glutenfri, gjer den ikkje mindre god for dei som tåler gluten. FOTO: Carl Martin Nordby
MAT FOR ALLE: At fiskegratengen er glutenfri, gjer den ikkje mindre god for dei som tåler gluten. FOTO: Carl Martin Nordby

God og glutenfri

Her er ein fiskegrateng ein ikkje treng å ha glutenintoleranse for å elske. 

Mange glutenallergikarar saknar å kunne fråtse i klassikarar som fiskegrateng, pizza og pastarettar. Svigerinna mi (med cøliaki) har i årevis inderleg håpa på at ein høveleg kokk i familien – eller ein av dei nærmaste til den høvelege kokken – skal rammast av glutenintoleranse eller cøliaki. "For då vil jo alle glutenfrie oppskrifter bli så utruleg mykje betre ..."

Jepp, ein av småttingane mine har fått utfordringar med gluten. Så då er det vel berre å brette opp ermane på kokkejakka då. Det eg har erfart etter å ha smakt litt på det som finst av glutenfrie produkt i butikkane, er at dei gjerne har ein konsistens og smak som ein beste fall kan omtalast som annleis. Meir presist får vi ofte ein porøs konsistens og ein litt "funky" kjemisk smak.

Artikkelen held fram under biletet

BLAND: Kokt torsk skal blandast i sausen.
BLAND: Kokt torsk skal blandast i sausen.

Ein kan sikkert venne seg til dette, men matoppleving strekkjer seg lengre enn til "etande". Alle har godt av å ete noko av det beste ein veit! 

Ein familiefavoritt er no blitt glutenfri fiskegrateng. 

Når ein tar kveitemjølet ut av oppskrifta, må ein erstatte det med eit anna fortjukkingsmiddel. Mest nærliggjande er maisenna, eit kvitt og smaklaust pulver. Men med berre maisenna kan fort konsistensen bli for tynn, oppsprokken eller grautete. I mi leiting etter kva som skal binde gratengen saman til ein saftig, smidig og passeleg kompakt masse, rota eg gjennom kjøkkenskuffer og skap, og her er det som kjent mykje rart. 

SAUS: Gratengsausen er hemmelegheita bak ein god fiskegrateng.
SAUS: Gratengsausen er hemmelegheita bak ein god fiskegrateng.

Valet fall på ein pose polenta. Polenta er eit gult, godt, male maisprodukt som tjuknar kraftig under koking. Produktet har alle eigenskapane som trengst for å gi ein tjukk og fyldig følelse. 

Fargen på gratengen blir litt gul, og den fargen forsterkar eg faktisk med gul karri og gulrøter. No får ein ein smaksrik, delikat gul og smidig grateng, heilt utan gluten, men full av smak og matglede. 

Som eit friskt tilbehøyr til ein kompakt grateng er ein sprek salat med tomatar, løk, salatblad, fennikel, olivenolje, balsamico og pinjekjernar ein innertiar. 

 

 

Til toppen