NOMINERT: Knut Skår er ein av åtte som kan bli kåra til årets frivillige i Norge.
NOMINERT: Knut Skår er ein av åtte som kan bli kåra til årets frivillige i Norge. (Foto: Øyvind Nondal/arkiv)

Han jobbar tusenvis av gratistimar kvart år

No kan innsatsen bli heidra.

Årdal: – Det er stort det, sjølvsagt, og ærefullt at folk meiner ein gjer ein såpass innsats, seier styreleiar Knut Skår, som har vore engasjert i ulike rollar i organisasjonen i over tjue år.

STOLT DAG: I 2017 fekk Knut Skår (i blå jakke i midten) helsa på kronprinsparet. Kurt Jarnes/Norske Redningshunder

Måndag vart det kjent at han er blant seks finalistar som kan vinna den nasjonale Frivilligprisen i 2019. Dei seks er valt av ein jury blant fleire hundre kandidatar. Vinnaren vil bli kåra 5. desember, på frivilligdagen.

Skår håpar på siger, men ikkje først og fremst for eigen del:

Reddar liv

– Prisen vil vera eit bevis på det viktige arbeidet Norske Redningshundar gjer. Eg er berre èin, men me er mange som gjer ein stor innsats, seier Skår.

Dei spesialtrena hundane kan ofte vera ein avgjerande ressurs når ein skal finna sakna personar, det kan vera folk som har gått seg ville, eller har blitt tekne i snøras. Nasjonalt tek organisasjonen på seg over 500 oppdrag i året.

– Me bergar nok ein del liv i løpet av året, seier Skår.

Trippel innertiar

Han tør nesten ikkje tenka på kor mange timar han brukar på det frivillige arbeidet i løpet av året. Men nokre tusen timar i året blir det fort, svarer han til slutt.

– Men så er eg litt meir engasjert enn dei fleste og då, seier Skår.

– Kva gjer det verdt all innsatsen?

– Eg brenn for organisasjonen. Det er som eit kinderegg, eg får jobba med hund, eg får vera ute i nauren og gjera ein humanitær innsats. Saman blir det ein fin kombinasjon. I tilllegg er me ein veldig flott kameratflokk, det sosiale betyr mykje óg, seier han.

Til toppen