Sogndal: – Eg er kjempeglad for det, seier Kevin Gray, som driv kafèen på Dampskipkaien i Sogndal.
Torsdag vedtok politikarane i formannskapet å gje Sogndal Fjell- og Fjordsportsenter 200.000 i lån til å pussa opp det såkalla sukkerlageret, tilbygget til Dampskipkaien i Sogndal.
For kafèdrivaren er det gode nyheiter.
– Når det blir eit ordentlig fjell- og fjordsportsenter, så er det kjempebra for drifta mi, for det skapar endå meir aktivitet, seier han.
Les òg: Slik vil dei skape eit senter for fjell- og fjordsport i Sogndal
Vil skapa meir aktivitet på kaia
– Dette er veldig hyggjeleg, og særs tiltrengde pengar, seier Ingvild Andersen, styreleiar i Sogndal Fjell- og Fjordsportsenter.
Planen i første omgang er å rusta opp sukkerlaget innvendig, måla den siste veggen på ekspedisjonsbygget, samt fiksa nokre takrenner.
– Bygget skal skinna på kaia. Me håpar å få gjort det før den største turiststraumen set inn, seier Andersen.
I tillegg til det estetiske er målet med oppussinga å legga til rette for meir aktivitet i bygget. Det vil bli laga til eit møterom, som skal kunne opnast opp slik at heile sukkerlageret kan bli teke i bruk ved større arrangement, som afterski, føredrag, filmframsyningar.
– Me tenkjer alltid fleirbruk når me rustar opp lokala, seier Andersen.
– Har store planar for kaia
På sikt er draumen å få sett inn store glasvindu på fasaden som vender mot fjorden, og laga til eit fjordbad med badstu.
– Me har teikningar frå arkitektfirma, og jobbar med å få inn prisoverslag. Men det er nok litt fram i tid, seier Andersen.
I andreetasje på ekspedisjonsbygget er målet framleis å få samla aktørane som driv med reiseliv i Sogn.
– Håpet er at det skal gje nye samarbeidsmoglegheiter og synergiar på eit område Sogndal allereie er kjent for og gode på. Me har store planar for kaia, seier Andersen.
