Lærdal: Den tradisjonsrike friluftsmarknaden vart denne helga arrangert for 34. gong. Maknaden som vert rekna å vere eitt av Noregs eldste har, med unntak av ein pause på 104 år, vorte arrangert kvar år sidan middelalderen. I våre dagar vert marknaden arrangert den tredje helga i juni.
Nær 90 seljarar
På programmet fredag opptredde Lærdal linedance med amerikansk dans. Dansen med opphav frå 1970-talet er bygd opp i ulike stegkombinasjonar.
Laurdag opna bodane klokka ti. Det var i følgje deltakarlista 86 ulike seljarar på marknaden i år. Her kunne publikum finne alt frå heimelaga matvarer til smykke og jordbruksmaskiner.
Noregsmeistar i handbak viste teknikk
Frå 12- tida hadde handbakgruppa i Lærdal framsyning i Rådhusparken.
Eirik Trulssen (17) seier til Porten.no at handbakgruppa viste fram ulike teknikkar i handbak og rekrutterte nye medlemmar til gruppa.
Trulssen vart for to månader sidan noregsmeistar i handbak. Han kom på førsteplass med høgrehanda og tok andreplassen i venstre.
– Det var mange som så på, og eit par som prøvde bryte legg Trulssen til.
Laurdagskvelden vart avslutta med rockabillytrioen Twang Gang i Kvammegården.
