GAMLE TRAKTER: Tonje Torvanger (til høgre) frå Sogndal er tidlegare elev på restaurant- og matfag, no kokk på prestisjetunge Statholdergaarden i Oslo. Her viser ho elev May Patcharin korleis maten blir laga på eit michelinkjøkken.
GAMLE TRAKTER: Tonje Torvanger (til høgre) frå Sogndal er tidlegare elev på restaurant- og matfag, no kokk på prestisjetunge Statholdergaarden i Oslo. Her viser ho elev May Patcharin korleis maten blir laga på eit michelinkjøkken.

Håpar nytt kjøkken skal få fart på matfaget i Sogndal

Søkartala har vore låge til restaurant- og matfag dei siste åra. No håpar dei trenden skal snu.

Sogndal: I dag vart det nye kjøkenet innvigd med ein trerettars meny signert tidlegare elev Tonje Torvanger.  Ho jobbar til dagleg på michelinrestauranten Statholdegaarden i Oslo og er i tillegg på kokkelandslaget for juniorar.

Kokketalentet har fått med seg at rekrutteringa til yrket kunne ha vore betre i Sogn. Men er optimist med tanke på at trenden no skal snu.

– Det at skulen er flytta til Sogndal og er ein del av Campus trur eg har mykje å seie. No har det vore nokre dårlege år og eg håpar det skal gå oppover. Bransjen er i allefall på veg opp og moglegheitane er store i yrket, seier ho.

Les også: Rektoren ser fram til opning av nytt skulebygg

FESTMÅLTID: Rektor Marta Sofie Vange (nummer tre frå venstre) hadde tatt seg tid til å smake på festmåltidet elevane stelte i stand i høve den offisielle opninga av kjøkenet.
FESTMÅLTID: Rektor Marta Sofie Vange (nummer tre frå venstre) hadde tatt seg tid til å smake på festmåltidet elevane stelte i stand i høve den offisielle opninga av kjøkenet.

– Dette blir noko heilt noko anna

Torvanger seier standarden har fått ei viss heving sidan ho gjekk på matfag for fem år sidan. Den gong heldt linja til på Hafslo i Luster.

– Dette kjøkkenet her er ei heilt anna verd. Du har alt av utstyr og det er som eit restaurantkjøken dei møter i arbeidslivet. Eg kunne nesten ønskje eg gjekk på skulen no, seier ho.

LEKRE RETTAR: Menyen var ein trerettars frå Statholdergaarden. Her er det hovedretten som tek form på tallerkenen.
LEKRE RETTAR: Menyen var ein trerettars frå Statholdergaarden. Her er det hovedretten som tek form på tallerkenen.

At rekrutteringa har vore eit problem er noko lærar Alfred Haukeland kan stadfeste. 

– Vi hadde helst sett at det var mange fleire som søkte. Det håpar vi at vi skal greie no med nytt kjøken og ny avdeling. Dette blir jo heilt noko anna, seier han.

Det nye kjøkenet er òg større og rommar ei produksjonsavdeling, varmtkjøken, koldtkjøken, dessertkjøken, grovkjøken, bakeri, fire kjølar og to frysar.

– No har vi fått det slik vi vil ha det, seier læraren.

ROMSLEG: God plass gjer at det er ulike stasjonar for det meste. Her er det desserten som blir anretta.
ROMSLEG: God plass gjer at det er ulike stasjonar for det meste. Her er det desserten som blir anretta.

Håper på større rift om plassane

Elev Olav Mjell Hovsvik er frå Hyllestad og kjem frå ein familie av kokkar. Men at det vart matfag i Sogndal var ikkje opplagt val.

– Eg var usikker på kva eg ville bli, men ville gjere noko aktivt og ikkje det same kvar dag. Då valte eg det, seier førsteårseleven.

NY I FAGET: Olav Mjell Hovsvik har eit halvt år bak seg på matfag i Sogndal. No ser han fram til å ta resten av utdanninga på eit splitter nytt kjøken.
NY I FAGET: Olav Mjell Hovsvik har eit halvt år bak seg på matfag i Sogndal. No ser han fram til å ta resten av utdanninga på eit splitter nytt kjøken.

Medelev May Patcharin håpar det blir meir rift om plassane når det nærmar seg skulestart igjen til hausten.

– Det blir kanskje lettare å lokke elevar hit med nytt og større kjøkken. Det ser litt meir interessant ut med nye og store maskiner, det trur eg folk likar, seier ho.

Skulen spelar ei viktig rolle i å fore turistnæringa i regionen med fagfolk. Det er ein av grunnane til at lærar Alfred Haukeland meiner det er avgjerande at dei greier å styrke faget.

– I Sogn, kor vi satsar på kortreist og tradisjonsrik mat, så er det viktig at vi har norske kokkar som kan lage den. Det er det turistbedriftene marknadsfører seg med. Og så trur eg ikkje mat vil gå av moten nokon gong, det vil alltid vere viktig.

FRISTANDE FORSMAK: Forretten var sett saman av kaldrøykt laks med dill, agurk, raudlauk, rug og pepparrot. 
FRISTANDE FORSMAK: Forretten var sett saman av kaldrøykt laks med dill, agurk, raudlauk, rug og pepparrot. 
Til toppen