NPK: Natt til søndag 29. oktober var det igjen slutt på sommartida. Klokka 03.00 vart klokka stilt tilbake èin time. No skal me følgja normal klokketid fram til siste helga i mars neste år.
Alle landa i Europa vekslar no mellom sommartid og vintertid, unntatt Island.
Det var Tyskland som i 1916 var dei første til å innføra sommartid. Målet var å spara energi ved at folk fekk éin time meir dagslys om kvelden sommarstid. Storbritannia følgde etter, medan me nordmenn ikkje byrja med dette fast før i 1980.
Finland innførte sommartid i 1981, men no er det blitt stor motstand i landet. Finske medlemmer av Europaparlamentet vil ha slutt på at ein skal stilla klokka to gonger i året, skriv Aftenposten. Dei meiner kvart EU-land sjølv bør bestemma om dei skal ha sommartid eller ikkje.
Ifølgje det finske nyheitsbyrået FNB føreslår dei finske europaparlamentarikarane å endra EU-direktivet som går ut på at alle EU-land skal gå over til sommartid på same dag. I finnane sitt naboland Russland blei dei lei av å stilla klokka i 2011.
