LUFTIG: I tredje episode gjekk gjennom Utladalen og deltakarane fekk ei luftig overnatting i hengekøyer over Vettisfossen.
LUFTIG: I tredje episode gjekk gjennom Utladalen og deltakarane fekk ei luftig overnatting i hengekøyer over Vettisfossen. (Foto: Kristin Folsland Olsen/TV Norge)

Her får fotballproffen eit luftig møte med Vettisfossen

Ein monsteretappe opp Tindevegen, ei spektakulær overnatting ved Vettisfossen og ei real styrkeprøve i Mørkridsdalen, er noko av det som ventar kjendisane i 71° nord.

Årdal/Luster: I årets kjendisutgåve av 71° nord er heile tre etappar lagde til Sogn. Produsenten seier den spektakulære naturen og den gjestfrie mottakinga då dei planla sesongen, gjorde det til eit enkelt val.

– Me reiser rundt på førehand og når me møter masse velvilje og glade folk som ønskjer at me skal komma, så er det gøy å legga programmet dit. Me fekk tre varierte og flotte episodar, så det var veldig verdt det, seier Ørjan Johansen, produsent i Nordisk Film, som lagar programmet for TV Norge.

PITSTOPP: Kjendisstylist Jan Thomas er blant deltakarane som verkeleg fekk det tøft på sykkeletappen opp Tindevegen. Foto: Kristin Folsland Olsen/TV Norge

Heftig oppleving i hengekøya

Blant kjendisdeltakarane som får testa grensene i sognanaturen er fotballspelar Jon Arne Riise, stylist Jan Thomas, tidligare handballspelar Håvard Tvedten, Plumbo-vokalist Lars Erik Blokkhus og nyleg pensjonert handballspelar Karoline Dyhre Breivang.

I episoden som blir vist søndag går turen gjennom Utladalen i Årdal. Å overnatta i hengekøyer ved Vettisfossen, 275 meter over bakken, blir av mange trekt fram som eitt av dei store høgdepunkta på turen frå sør til nord i landet.

– For deltakarane var det eit minne for livet. Nokre av dei trur knapt dei kan greia å toppa den opplevinga, seier Johansen.

Men sjølv om dei fekk tid til å nyta idyllen, blir det òg eit tøft møte med dei bratte fjella i området.

To tøffe styrkeprøver

I andre episode, som gjekk sist søndag, fekk kjendisane verkeleg testa seg når dei sykla 1300 høgdemeter opp Tindevegen frå Øvre Årdal. Målet for etappen var å komma først i mål på fjellgarden Fuglesteg i Luster. 

Fjerde episode blir ikkje ei mindre styrkeprøve, når deltakarane, med tunge sekkar, skal kappast frå Skjolden og opp til Åsetvatnet, før dei tek seg ned Mørkridsdalen.

BEINHARD IDYLL: Med tunge sekkar på ryggen fekk deltakarane kjenna på slitet gjennom Mørkridsdalen i Luster. Foto: Kristin Folsland Olsen/TV Norge

– Det var fleire som var så slitne som dei aldri har opplevd før, seier Johansen om dei to styrkeprøvene.

Håpar på god effekt for reiselivet

 

I januar i år fekk realityserien Nordnorsk markedsføringspris, for måten den har bidrege til å løfta reiselivet i regionen. Rundt halvparten av episodane har blitt filma i Nord-Norge.

Johansen håpar at årets kjendissesong gjer at fleire får augene opp òg for naturen i Sogn.

– Me håpar jo at programmet vårt inspirerer folk til å komma seg ut på dei plassane vi er, og at det betyr noko for regionen. Det er absolutt viktig for oss. Me hadde ei fantastisk veke og vel så det i Sogn, seier han.

Til toppen