AUSTOVER: Anneli Nesteng går frå å vera Hydro sin kraftverkssjef i Sogn til å bli fabrikksjef ved selskapet sitt valseverk i Holmestrand. Foto: Øyvind Breivik/Hydro
AUSTOVER: Anneli Nesteng går frå å vera Hydro sin kraftverkssjef i Sogn til å bli fabrikksjef ved selskapet sitt valseverk i Holmestrand. Foto: Øyvind Breivik/Hydro

Ho forsvinn frå Sogn

​Anneli Nesteng går frå stillinga som Hydro sin kraftverkssjef i Sogn til å bli fabrikksjef ved selskapet sitt valseverk i Holmestrand. Jakta på ny kraftverkssjef er i gang. 

Årdal/Sogndal: Nesteng har vore kraftverkssjef i Sogn sidan våren 2013. Dei siste fire åra har ho bodd i Sogndal og pendla mellom Hydro sine kraftverksstasjoner i Luster og Årdal.

Vil sakna Sogn

– Eg har hatt ei fantastisk tid her i Sogn, og det blir vemodig å skulle reisa frå dei fine folka og den fantastiske naturen her. Men når denne moglegheita dukka opp var eg ikkje i tvil om at det var det rette valet for meg, seier Nesteng i ei pressemelding. 

Hydro produserer årleg over tre terrawatt-timar med elektrisk energi i Sogn, tilsvarande årsforbruket til om lag 150.000 einebustader. Krafta brukar Hydro til å produsera aluminium i Høyanger og Årdal. 

Jakta på personen som skal erstatta Nesteng i Sogn er i gang internt i Hydro, og selskapet opplyser at ambisjonen er å ha ei avklåring på dette spørsmålet før Nesteng trer frå stillinga 1. mars. 

Blir sjef i jubileumsår

Hydro Holmestrand blei etablert i 1917 for å videreforedla aluminium som blei produsert i Høyanger. I år vil verket produsera om lag 90.000 tonn produkt av valsa aluminium. Ein stor del av dette er basert på resirkulering, og verket er blant anna ansvarleg for å resirkulera alle drikkeboksar som blir panta i Noreg. 

– Hydro Holmestrand feirar 100 år i år, så det er ei stolt historie eg no får vera med på å utvikla vidare. Dette er ei utfordring eg gler meg veldig til, sier Nesteng.

Til toppen