DOBBEL DEBUT: Først debuterte ho for J19-landslaget (til venstre), så tok Marte Bjelde Hjelmhaug steget opp på det øvste nivået i norsk kvinnefotball då ho debuterte for Sandviken tre veker seinare. Foto: Andreas Kristoffer Berge/kvinneidrett.no, privat.
DOBBEL DEBUT: Først debuterte ho for J19-landslaget (til venstre), så tok Marte Bjelde Hjelmhaug steget opp på det øvste nivået i norsk kvinnefotball då ho debuterte for Sandviken tre veker seinare. Foto: Andreas Kristoffer Berge/kvinneidrett.no, privat.

I helga debuterte ho i Toppserien, no ventar EM-kvalik

Marte Bjelde Hjelmhaug (17) frå Sogndal susar i rekordfart mot toppen av norsk kvinnefotball.

Sogndal: For nokre månader sidan spelte ho i andredivisjon for Kaupanger. Sidan har ho debutert for både J19-landslaget og Sandviken i Toppserien, alt på under tre veker.

Og om litt reiser Marte Bjelde Hjelmhaug til Polen for å kjempe om kvalifisering til EM.

– Det er litt uverkeleg at alt skjer så fort. Men eg synst det har gått ganske fint, seier ho.

Les også: – Med vårt beste lag er me klart sterkast i divisjonen

STORT: Her får Marte Bjelde Hjelmhaug (i drakt nummer 13) debuten på J19-landslaget.
STORT: Her får Marte Bjelde Hjelmhaug (i drakt nummer 13) debuten på J19-landslaget.

Kjapp debut

Sjølv om ho tidlegare har hospitert hos bergensklubben kom overgangen heilt uventa.

– Ingenting var planlagt før sommaren, så kom Sandviken på bana. Det vart bestemt på to-tre veker, seier Bjelde Hjelmhaug. 

Toppseriedebuten kom allereie i helga, då ho vart bytta innpå halvtimen før slutt i 0-0 kampen mot tabellnabo Røa.

– Eg synst det er utruleg stort å få debutere så tidleg etter overgangen. Det gir meg mykje motivasjon, seier ho. 

Les også: Den gode haustsesongen held fram for Kaupanger

Det er venstrebacken ho satsar på å erobre, men i debuten vart ho kasta inn på kanten. Der fekk ho merke at nivået er nokre hakk opp frå det ho er vant med, ikkje minst intensiteten og tempoet.

–  Eg var utruleg spent før eg skulle innpå. Men det var ei god oppleving og eg følte eg kom godt ifrå det. Det var spesielt kjekt å få debuten i ein jamn og viktig kamp, seier ho.

Fin utviklingsarena 

I midten av august debuterte ho på J19-landslaget i ein privatlandskamp mellom Norge og Sverige. No er ho teken ut til EM-kvalik i Polen frå 12. til 21. september.

– Eg synst det var heilt fantastisk å få sjansen. At eg blir tatt ut igjen viser at eg har levert det eg bør, seier ho.

17-åringen har oppnådd mange milepælar på kort tid. No er målet å spela seg til seg fast plass på J19-landslaget, og gjere det same i Toppserien innan eitt til to år. 

Den raske framgangen bør samstundes vere eit bevis for tidlegare lagveninner på Kaupanger om at det er mogleg å ta steget. 

– Sogn og Fjordane har produsert masse landslagsspelarar og eg er ein av dei. Eg har hatt Elise Thorsnes å sjå opp til. Viss eg kan inspirere andre, så er det berre kjekt, seier ho.

Til toppen