Sogn og Fjordane: I tredje kvartal i år fekk fylket heile 669 nye innbyggjarar.
– Alle desse var utanlandske personar, opplyser informasjonsrådgjevar Mathias Helgheim i Sogn og Fjordane fylkeskommune til Nynorsk pressekontor.
Innvandringa frå utlandet er ikkje spesielt for Sogn og Fjordane. Alle fylke i landet hadde ifølgje Statistisk sentralbyrå (SSB) flytteoverskot frå utlandet i same periode, men nettoinnvandringa var størst i Sogn og Fjordane med vel 500 personar.
Veksten i folketalet gjer at Sogn og Fjordane for første gong har passert 110.000 personar.
Den innanlandske tilflyttinga er derimot negativ. I tredje kvartal flytta 1.015 personar frå Sogn og Fjordane til andre stader i landet, medan 901 personar flytta til fylket frå andre plassar i Noreg.
Også fødselsoverskotet går ned. I tredje kvartal i år var det på 61 personar mot 119 på same tid i fjor.
Til saman bur det no 110.362 innbyggjarar i Sogn og Fjordane. (©NPK)
