FC Honka-Sogndal: 1-1 (2-4 samanlagt)
G19-laget til Sogndal er vidare til andre kvalifiseringsrunde i UEFA Youth League, der dei skal møta moldovske Sheriff. Det vart klart etter at laget greidde 1-1 borte mot FC Honka torsdag kveld.
FC Honka-Sogndal 1-1
Youth League: Andre oppgjer i første kvalikrunde.
Stadion: Sonera Stadium
Resultat samanlagt: 2-4 til Sogndal
Målskårar Sogndal: Adrian Solberg (17.)
Gule kort, Sogndal: Kasper Bordvik (62.), Mikkel Erlandsen (90.+4)
Laget som starta: Håvard Hetle, Eivind Helgesen, Kasper Bordvik, Adrian Solberg, Eirik Lereng, Mikkel Erlandsen, Anders Nord, Sivert Mannsverk (kaptein), Elias Mittet, Vegard Halset og Mathias Sundberg.
Benken: William Rakkenes (inn for Sundberg i det 88. minutt) , Per Michael Thune, Eirik Stokkenes (inn for Halset i det 66. minutt), Filip Mardal, Johan Bakke, Gøran Njøs og Iver Skorve.
– Det me har fått til no er heilt enormt. Denne gjengen her overraskar meg heile vegen, seier trenar Nils Tore Krosshaug, som vart intervjua på direkten på Facebook-sida til Sogndal Fotball like etter kampen.
Den erfarne trenaren var tydeleg rørt over prestasjonen til laget.
– Me får litt trykk mot oss i andre omgang, men me står distansen. Slik er det å spela borte, det er snakk om å forsvara seg med sogndalemblemet langt utapå drakta, og det gjer dei i dag, seier trenaren.
Prestasjonen blir kanskje ekstra spesiell med tanke på at berre seks spelarar er att frå ellevaren som starta i fjorårets NM-triumf mot Rosenborg, og dermed sikra kvalifisering til Youth League.
Her kan du sjå jubelscenene etter kampen, og høyra intervju med trenar og spelarar. Video: Sogndal Fotball. Saka held fram under.
Stolt keeper
Adrian Solberg skaffa bortelaget leiinga etter berre 17 minutt, medan utlikninga kom like før pause.
– Det blir ingen enkel kamp, men me står opp i kvar einaste duell, og det er heilt fantastisk. Eg er så utruleg stolt av det laget her, seier målvakt Håvard Hetle i intervjuet med Sogndal Fotball.
På heimebane vann Sogndal 3-1, dermed vart det 4-2-siger samanlagt, og avansement til andre kvalikrunde.
Neste motstandaren høyrer heime i Tiraspol, som med sine rundt 130.000 innbyggjarar er den nest største byen i Moldova. Sheriff har vunne den heimlege serien sytten gongar, vore i gruppespelet i europaligaen fire gongar, og spelt kvalifisering til mesterligaen éin gong.
Laga møter kvarandre 6. og 27. november. Vinnaren skal møta ein av toarane frå dei åtte Champions League-gruppene til ein avgjerande kamp om plass i sluttspelet. Motstandarane blir trekte i desember, medan kampane går i februar.
Sluttspelet i Youth League startar med åttandedelsfinale i mars.
