UENDRA: Tilrådinga om å ikkje starta andretrinnet på medielinja til hausten vart skrota.
UENDRA: Tilrådinga om å ikkje starta andretrinnet på medielinja til hausten vart skrota. (Foto: Sogndal VGS)

Medielinja berga igjen

Nok ein gong sørga fylkespolitikarane for snuoperasjon.

Sogndal/Førde: Hovudutvalet for opplæring skulle onsdag ta stilling til kva studieretningar som skal få halda fram til neste år.

Sjølv om tilrådinga var å flytta tilbodet til Førde, valde politikarane å likevel starta opp ein medieklasse på andre trinnet på Sogndal vidaregåande skule til hausten.

– Me har jobba godt i lag med administrasjonen og politikarane, og me har funne ei løysing som gir rom for tilbodet, seier Torvanger til NRK.no, som første melde om nyheita.

På bakerste benk i Fylkeshuset på Leikanger sat spente elevar og følgde med.

– Me vart oppdaterte undervegs, og er sjølvsagt kjempeglade over utfallet, seier medielærar Inge Kjell Holme.

Han tykkjer vedtaket var ein naturleg konsekvens av det solide søkartalet dei opplevde i vår. Atten søkarar er rekord etter at media vart studiespesialisande retning. I Førde var det til samanlikning elleve søkarar.

– Det viser at linja i Sogndal har ei vanvittig livskraft, seier Holme.

Den einaste endringa av det utlyste tilbodet i Sogndal er at første trinnet på helse og oppvekst vert auka frå 2 til 3 grupper. Ved Årdal vidaregåande skule vart det ikkje vedteke endringar.

Til toppen