NYPREPPA: I går gjekk preppemaskina for fullt mellom Gramstølen og Brusestølen og området austover inn mot fjellheimen. Privat foto
NYPREPPA: I går gjekk preppemaskina for fullt mellom Gramstølen og Brusestølen og området austover inn mot fjellheimen. Privat foto

Melder om svært gode skitilhøve rundt Gramstølen

Medan vinden har forsvunne med mykje av snøen på høgste Filefjell, er det nypreparerte løyper på vestsida

Lærdal: – Me køyrde opp alle løyper i går, det meste med preppemaskin og noko med skuter. Og alle løyper er stikka, seier Thomas Hjermann, styreleiar i Filefjell Eiendomsutvikling AS.

Dei har ansvaret for skiløypene mellom Gramstølen og Brusestølen, og løypenettet vidare austover og innover fjellet. 

Sjå kart over alle løypene med oppdatering som syner når løypene sist er køyrt opp her

– Perfekte tilhøve

GODE TILHØVE: Eit lite lag nysnø har lagt seg i dei nypreppa løypene, noko som ifølgje Thomas Hjermann gjer tilhøva framifrå. Privat foto
GODE TILHØVE: Eit lite lag nysnø har lagt seg i dei nypreppa løypene, noko som ifølgje Thomas Hjermann gjer tilhøva framifrå. Privat foto

– Det er kjempefint for bygdefolk å gå frå Gramstølen til Brusestølen eller omvendt – ei kupert og artig løype. No kan det kanskje bli utfordringar med parkeringsplass i helga på Gramstølen ettersom det er vinterferie i Bergen komande veke, men på Brusestølen går det vanlegvis greitt å parkera, seier Hjermann.

Lengre opp mot snaufjellet er det mange avblese områder, mellom anna hadde dei ikkje nok snø til å få arrangert barneskirenn på Buhaugane.

– Men her nedi er det perfekte tilhøve med ein til to centimeter nysnø oppå solen; perfekt styresnø, seier Hjermann

Han melder vidare om at dei ikkje får køyrt preppemaskina att før måndag ettersom den er til reperasjon etter at det vart skader på beltet.

 

Til toppen