SUKSESS: Lerum er kjent for saft og syltetøy laga av frukt og bær. No gjer dei òg suksess med den kalorifrie avstikkaren ZERoh!. Administrerande direktør Trine Lerum Hjellhaug har all grunn til å smila.
SUKSESS: Lerum er kjent for saft og syltetøy laga av frukt og bær. No gjer dei òg suksess med den kalorifrie avstikkaren ZERoh!. Administrerande direktør Trine Lerum Hjellhaug har all grunn til å smila. (Foto: Halvor Farsund Storvik)

Nylansering frå Lerum gjekk frå null til hundre millionar i omsetning på tre år

Torsdag vart saft- og sylteprodusenten frå Sogn heidra for utrulege veksten dei har opplevd etter at leskedrikken ZERoh! kom på marknaden.

Oslo/Kaupanger: Torsdag deltok Lerum i Anfo Effekt, reklamebransjens svar på Spellemannsprisen. Heile 140 reklamebyrå kjempa om kven som har laga den beste og mest effektive reklamekampanjen.

– FANTASTISK: Espen Arnesen i Lerum seier dei har lukkast i ein bransje der dei fleste nyvinningane er ute av hyllene før det har gått tre år.

Lerum vann både hovudprisen og i kategorien Vekst med den kalorifrie leskedrikken ZERoh!. Den gjekk frå null til 111 millionar i omsetning på tre år frå 2013 og 2016, mykje takka vera effektiv marknadsføring, meinte juryen.

– Me har vore norgesmeistrar i vekst dei siste tre åra. Det synst me er fantastisk, seier Espen Arnesen, marknadsdirektør i Lerum.

Tøff konkurranse

Bak jobben står reklamebyråa MK Norway, Strømme Throndsen Design og Vizeum, i tillegg til Lerum sjølve, skriv Kampanje.com, nettstaden som første melde om utdelinga.

– Me er kjempeglade for å vinna ein slik pris, mest fordi den, i motsetning til dei fleste andre slike prisar, vektlegg dokumentert og varig salsvekst, noko som er det viktigaste for oss. Og det skjer på tvers av alle bransjar, i konkurranse med store bankar og daglegvareleverandørar, seier Arnesen.

POPULÆR NYKOMAR: Med ZERoh! har Lerum på tre år erobra ein tredel av marknaden for kalorifri leskedrikk.

For å setta resultata i perspektiv, nemner han at det kvart år blir handla kalorifri leskedrikk for 330 millionar i butikkane. På tre år har altså Lerum tatt ein tredel av segmentet, som hovudkonkurrenten Fun Light vår åleine om då ZERoh! kom på bana.

Laga av Lerum, men utan merkenamnet

– Det er sterke resultat. Me hadde vore nøgde om me fekk 10-20 prosent, no har me ein tredel og er framleis i vekst, seier Arnesen.

Ei anna faktaopplysning som kastar lys over prestasjonen, er at 90 prosent av alle lanseringar i daglegvarebransjen forsvinn frå butikkhyllene i løpet av tre år. 

Sjølv om ZERoh! har blitt ei suksesshistorie for Lerum, har dei likevel valgt å ikkje bruka logoen og merkevara på produktet. 

– Det var ein lang diskusjon internt som handla om merket sine verdiar. Slagordet vårt er jo «ekte vare smakar best», og for oss betyr det bruk av frukt og bær. ZERroh! skulle vera heilt utan kaloriar, og det let seg diverre ikkje kombinera med fruktsukker, seier Arnesen.

Til toppen