OPNING: Fungerande ordførar, Odd Harald Eide (Ap), stod for den offisielle opninga av dagsturhytta og snorklippinga.
OPNING: Fungerande ordførar, Odd Harald Eide (Ap), stod for den offisielle opninga av dagsturhytta og snorklippinga. (Foto: Gulen kommune)

BILDESERIE

Opna Gulakvila offisielt, men dagsturhytta er allereie godt besøkt

Kring 300 personar har allereie skrive seg inn i hytteboka i dagsturhytta i Gulen. Fredag var det offisiell opning med skuleelevar og gjestar til stades.

Gulen: – Dørene til hytta opna 26. august. Når kring 300 personar har skrive seg inn i hytteboka, kan ein rekne med at ein god del har vore der og gått forbi utan å skrive seg inn, seier kulturkonsulent i Gulen kommune, Vivian Våge. 

Sjå biletserie nedst i saka. 

Fredag var det offisiell opning av dagsturhytta i Gulen, Gulakvila. Kring 150 personar tok turen til hytta, ifølgje Våge. Heile Eivindvik skule var med, i tillegg til ein del andre folk. 

Turen starta ved kommunehuset og det var markering då følgjet kom til hytta. Maja Hjønnevåg Wesenlund song, medan fungerande ordførar Odd Harald Eide (Ap) stod for den offisielle opninga.  I tillegg var representantar frå Sogn og Fjordane fylkeskommune, Sparebanken Sogn og Fjordane og Norsk tipping til stades. 

Det har vore ein del dugnadsinnsats frå lokale krefter for å få i stand hytta, ifølgje Våge. Eivindvik idrettslag har gjort klar byggjetomta, medan enkeltpersonar har arbeidd frivillig på dugnad med ein terrasse rundt hytta. Prosjektleiar for Gulen kommune, Geir Haveland, har styrt dugnadsgjengen. 

TALE: Reidun Høydal frå Sparebanken Sogn og Fjordane heldt tale under opninga. (Foto: Gulen kommune)
TOK TUREN: Heile Eivindvik skule og ein del andre folk tok turen opp til hytta for å vere med på opninga. (Foto: Gulen kommune)
MASKOTTAR: Maskottar frå Kongleriket hadde forvilla seg frå Kongleskogen til Gulakvila. (Foto: Gulen kommune)
GÅVE: Kulturkonsulent Vivian Våge tok imot ei gåve frå kommunen til Gulakvila. Det var bygdebøker for Gulen i tre bind. Desse skal vere til glede for alle som vitjar hytta. (Foto: Gulen kommune)
FLAGG: Fylkeskommunen hadde teke med det norske flagget for høvet. (Foto: Gulen kommune)
SOLSKIN: Dei som deltok på opninga kunne nyte nydeleg haustvêr. (Foto: Gulen kommune)
PREMIAR: Sparebanken Sogn og Fjordane delte ut premiar etter ein natursti. (Foto: Gulen kommune)
KAKEVAKT: Prosjektleiar i Gulen kommune, Geir Haveland (framme t.v.), sørgde for at opningskaka kom trygt fram. (Foto: Gulen kommune)
BAKST: Mange hadde bidrege med noko å bite i på opninga (Foto: Gulen kommune)
FØRSTE STYKKET: Kulturkonsulent i Gulen kommune, Vivian Våge, avslutta dagen med å servere kvit dame til alle. (Foto: Gulen kommune)
UTSIKT: Utsikta utover fjorden og mot havet frå hytta. (Foto: Gulen kommune)
BYGDA: Utsikt ned mot Eivindvik og innover fjorden frå hytta. (Foto: Gulen kommune)
SKILTING: Det er skilta til hytta frå parkeringsplassen slik at alle skal kunne finne fram. (Foto: Gulen kommune)
Til toppen