FORHANDLINGAR: Forhandlingar mellom eigarane av ferjeselskapet Fjord1 gjer at den tillyste rettssaka mellom Sogn og Fjordane fylkeskommune og deleigaren Havila kan koma til å bli avblåst i tolvte time. Foto: Truls Grane Sylvarnes.

Optimisme rundt nye Fjord1-forhandlingar

Forhandlingar mellom eigarane av ferjeselskapet Fjord1 gjer at den tillyste rettssaka mellom Sogn og Fjordane fylkeskommune og deleigaren Havila kan koma til å bli avblåst i tolvte time.

NPK
15. Aug 2016 - 15:32

Indre Sogn: Det skriv Firda. Fylkespolitikarane i Sogn og Fjordane hadde sist veke fleire ekstraordinære møte om eigarskapen i ferjeselskapet etter at Konkurransetilsynet tidlegare i sommar stoppa salet av Fjord1 til Torghatten.

Etter det avisa har grunn til å tru, skal det også ha kome i gang ein dialog mellom fylkeskommunen og Fjord1-medeigar Per Sævik. Han representerer mindretalsaksjonæren Havila som har 41 prosent av aksjane i Fjord1, medan fylkeskommunen har 59 prosent.

Havila har varsla sak mot fylkeskommunen fordi dei meiner forkjøpsretten deira er omgått. Saka skal etter planen ta til 29. august, men avisa meiner begge partar har eit sterkt ønske om å unngå ei slik sak som kan koma til å vara i fleire år.