GJER SEG NESTEN SJØLV: Grønsaker og lammelår steikjast saman i omnen. FOTO: Carl Martin Nordby /
GJER SEG NESTEN SJØLV: Grønsaker og lammelår steikjast saman i omnen. FOTO: Carl Martin Nordby /

Påskelam som lagar seg sjølv

Medan ansiktet vert langtidssteikt i solveggen, ligg lammelåret og rullar seg i appelsinsmak i omnen. Først når du har fått dei første freknene, er lammet ferdig.

Heime eller borte, i påska er det aldri feil med eit enkelt, men imponerande lammemåltid som i stor grad gjer seg sjølv.

Du treng ikkje tenkje på utbeining, kraftkoking, tidkrevjande garnityrar eller jålete pynt. Bruk heller tida ute i solveggen medan lammet styrer seg sjølv inne på kjøkenet. Prosessen rundt langtidssteiking er for oss matinteresserte like spennande som sjølvaste påskekrimmen – og først når ein set tennene i det perfekt møyre kjøtet, fell alle brikkene på plass.

 APPELSIN: Smakskomposisjonen byggjer opp om påskestemninga.
 APPELSIN: Smakskomposisjonen byggjer opp om påskestemninga.

Store, solide grønsaker som toler ein tur i både skiboks og pulk, er kvalifisert til å bli med i omnen. Sellerirot, gulrot, løk, kvitløk og purre høyrer til denne tøffe gjengen som skal blandast med bitar av appelsin og rosmarin.

Nokre friske urter er veldig følsame, men rosmarinkvastane smaker like godt sjølv om dei har vore på tur ei stund. Rosmarin inneheld mykje eteriske oljer som ein kjenner som ei seig hinne på fingertuppane når ein tar i han. I denne oljen sit all den gode rosmarinsmaken som passar så perfekt til lammekjøt.

Det vert selt svært få ferske lammelår på denne tida av året, men det er ikkje krise av den grunn. Lammelår som er vakuumpakka og frose inn, fungerer veldig bra. Eit vakuumpakka lammelår på 3 kilo kan du ta ut av frysaren fem dagar før det skal lagast til. Då tiner det stille og roleg, og kjøtet blir mest mogleg likt fersk tilstand.

Små poteter med tynt skal er hyllevare i alle butikkar no. Kok dei heile med skalet på, i vatn med mykje salt. Når ein løftar dei ut, dampar vatnet vekk, og dei får små lyse saltkrystallar på skalet.

Artikkelen held fram under biletet

ROSMARIN: Fantastisk til lammekjøt.
ROSMARIN: Fantastisk til lammekjøt.

Den enklaste og kanskje mest kledelege sausen til dette måltidet er ein kvikk og sterk kvitløksmajones. Majonesen kan kjøpast ferdig og blandast ut med kvitløk, litt sitronsaft og mykje grovmalen pepar rett frå kverna.

Plukk ned eit fat frå hylla, blås støv av det og legg på appelsin-/grønsaksraguen. Låret kuttast i skiver og leggjast oppå. Då kan alle vaske klisteret av hendene og setje seg til bords!

Til toppen