HELD FRAM SØK: Stian Hofslundsengen frå Røde Kors og politibetjent Britt Brugrand held post ovanfor flyplassen. Politiet har ansvar for leitinga, medan Røde Kors bistår med kart og GPS for å få registrert søka. 
HELD FRAM SØK: Stian Hofslundsengen frå Røde Kors og politibetjent Britt Brugrand held post ovanfor flyplassen. Politiet har ansvar for leitinga, medan Røde Kors bistår med kart og GPS for å få registrert søka. 

Politiet har starta nye søk etter sakna 37-åring

Hundepatruljar frå Bergen søkjer no etter 37-åringen frå Årdal som forsvann frå eit turfølgje for litt over to veker sidan.

Politibetjent Britt Brugrand fortel at dei fire hundepatruljane skal leite i dag og i morgon i området rundt Sogndal lufthamn på Haukåsen. Seksten dagar har gått sidan 37 år gamle Christer kom vekk frå turfølgjet som gjekk langs ein grusveg ikkje langt frå flystripa.

– Dei vil ta utgangspunkt i det punktet der den siste sikre observasjonen av den sakna vart gjort, seier Brugrand.

Les også: Ingen spor etter sakna 37-åring 

Måten søket føregår på blir kalla rundering. Hundeførarane går langs inndelte linjer eller aksar i terrenget, medan hundane vert sendt ut til sidene for å søkje etter spor.

Hundane går etter lukt og varslar hundeførarane når dei oppdagar noko. Målet er sjølvsagt å finne den sakna, men eit kvart spor kan vere verdifullt. 

– Hundane kan søke etter nøklar, belter, mobiltelefonar, jakker, kva som helst. Dei søkjer etter gjenstandar som ikkje høyrer heime i terrenget, seier Brugrand.

Les også: Vurdering av lege: – 37-åring er truleg omkomen

Haukåsen husar ikkje berre ein flyplass, det er òg eit populær turområde på Kaupanger. Politiet fryktar ikkje at all aktiviteten skal ha forsøpla eventuelle spor.

– Dei skal kunne finne det dei leitar etter likevel, seier Brugrand.

Lensmann Arne Johannessen har tidlegare sagt at politiet planleggjer ein større leiteaksjon tidleg i juli.

Til toppen