INTENSJONSAVTALE: Fylkesordførar i Sogn og Fjordane Jenny Følling (f.v.), fylkesordførar i Hordaland Anne Gine Hestetun og fylkesordførar i Rogaland Solveig Ege Tengesdal skreiv under på intensjonsavtalen om ein ny vestlandsregion for ein liten månad sidan. Rogalendingane har vore mest skeptiske, men ser no ut til å halla mot eit "ja" i følgje BT. Arkivfoto
INTENSJONSAVTALE: Fylkesordførar i Sogn og Fjordane Jenny Følling (f.v.), fylkesordførar i Hordaland Anne Gine Hestetun og fylkesordførar i Rogaland Solveig Ege Tengesdal skreiv under på intensjonsavtalen om ein ny vestlandsregion for ein liten månad sidan. Rogalendingane har vore mest skeptiske, men ser no ut til å halla mot eit "ja" i følgje BT. Arkivfoto

Rogaland hallar mot ja til vestlandsregion

I Rogaland ser det ut til at ein allianse mellom Frp, KrF og Ap kan sikre fleirtal for ein vestlandsregion, skriv Bergens Tidende.

Så langt har det vore svært uvisst om det er mogleg å samle eit fleirtal for intensjonsavtalen om ei samanslåing med Hordaland og Sogn og Fjordane i fylkestinget i Rogaland. Mellom anna har Frp vore delt i synet på vestlandsregionen, men har no bestemt seg for å seie ja.

– Vi har ikkje hatt avstemming, men det hallar mot eit ja, seier fylkestingsrepresentant Pål Morten Borli (Frp) til Bergens Tidende.

Signala er òg positive frå fylkestingsgruppene til Ap og KrF, som saman med Frp har 26 av dei 42 representantane i fylkestinget.

Etter det avisa får opplyst frå Høgre, SV, Dei grøne, Sp og Venstre i Rogaland, tyder alt på at desse partia kjem til å stemme mot intensjonsavtalen om ein vestlandsregion.

Mens fylkespolitikarane i Hordaland vedtok å sende intensjonsavtalen på høyring førre veke, er det òg uvisst kor Sogn og Fjordane landar. Der får no fylkesordførar Jenny Følling (Sp) mykje motbør frå eige parti, som kan komme til å stemme mot fylkessamanslåinga. (©NPK)

Til toppen