Lærdal: I helga var det marknad i Lærdal, med eit variert program og ei røys med utstillarar og spanande boder.

Av dei faste innslaga på programmet fann me Speletreffen, danseframsyning frå Lærdal linedance og treffet til Indre Sogn Automobilclub.

Ei av nyvinningane var trikseskulen og showet til Brynjar Fagerli, ein av dei største ballkunstnarane i verda. Eit anna var teaterstykket Gjesmearkivet av Jostein Avdem Fretland, som hadde til saman seks førestillinga i Telegrafen i løpet av helga, inkludert premieren torsdag. 

Temaet for årets marknad var Typisk Lærdal, same namnet som prosjektet kommunen har gåande for å utvikla spennande lærdalsprodukt. Historisk kunne temaet neppe ha vore meir passande.

Lærdalsmarknaden starta opp alt på slutten av 1500-talet og levde uavbrote i nesten 300 år før den vart offisielt nedlagt i 1876. Etter ein pause på vel hundre år starta handelsstanden oppatt marknaden i 1982 og sidan har den levd i nokolunde same form fram til i dag.