SITRONDRAUM: Har du fire økologiske sitronar for handa, er ikkje denne kaka langt unna. Foto: Carl Martin Nordby.
SITRONDRAUM: Har du fire økologiske sitronar for handa, er ikkje denne kaka langt unna. Foto: Carl Martin Nordby.

Snerten terte

Smaken og utsjånaden på denne sitronterta skin om kapp med sola på Amalfikysten.

Ei vellykka sitronterte baserer seg på to hovudelement: ei bra oppskrift og gode sitronar. Her har vi begge delar. Terta er skapt av Marco Pierre White, kjent som mannen som laga mat som ein engel og såg ut som ei rockestjerne. Hans "lemon tarte" er frå den legendariske kokeboka "White heat" frå 1989.

I sin praktiserande periode var White ein kompromisslaus kokk med eit veldig stort ego og eit enormt repertoar av himmelske rettar. Han herja vilt i restaurantverda i London, inspirerte kollegaer i heile Europa og blei som 33-åring den første britiske kokken løna med tre stjerner i Guide Michelin.

Sitronterta hans var ein av rettane som tok pusten frå restaurantgjester og meldarar heilt til White la kniven på hylla og leverte tilbake sine tre stjerner i 1999.

Noko av løyndommen ved smaken er det ytste gule skalet på sitronane. Sitronar er ei av dei fruktene som blir sprøyta mest, og som blir voksa. Dette er ikkje så bra å ete, så når vi skal bruke skalet vel vi alltid økologiske sitronar. Sitronane frå Amalfikysten i Italia har sin sesong frå jul og fram mot våren. Desse sitronane har fått vekse fritt for sprøytemiddel og er fulle av smakfull juice og ein fabelaktig fruktig og aromatisk smak av sitron. Amalfisitronane blir ofte selde med ein liten stilk med blada hengande på. Sjå etter dei i butikken, og nyt dei no medan dei framleis er i sesong!

Artikkelen held fram under biletet.

SKAL: Legg merke til at det steikte terteskalet går godt over kantane.
SKAL: Legg merke til at det steikte terteskalet går godt over kantane.

Tilbehøyr til ei slik kake er nesten overflødig. Smaken av mjøl, vaniljestong og smør frå den sprø botnen akkompagnerer smaken av sitronkremen og den silkemjuke konsistensen perfekt. Det einaste eg kan kome på er nokre rista pekannøtter ved sida av. Pekannøtter finn du i bakehylla i butikken. Det er litt sånn med oss kokkar at vi plutseleg får ei favorittråvare som skal brukast til alt, no er det pekannøtter for min del. Etter ein runde i omnen blir dei supersprø og aromatiske, med ein uimotståeleg og unik nøttesmak. Uttrykket "passar til alt" er dekkjande for toasta pekannøtter. Dei kan løfte salaten, ostetallerkenen, desserten eller middagen din på eit blunk.

Mest for fargen si skuld kan ein hive nokre bringebær etter kaka, sjølv om eg mistenkjer at Mr. White ville vaska golvet med meg for det forslaget ...

Framgangsmåte

Botn: Kutt kaldt smør opp i små terningar og smuldre dei opp saman med mjøl og salt i ein stor bolle. Dryss over melis og smuldre inn dette også. Snitt vaniljestonga og skrap ut "margen". Visp vaniljemargen saman med eit heilt egg og ei eggeplomme. Hell dette over deigen og kna til den så vidt heng saman på benken. Press ut deigen til ein sirkel med rundt 15 centimeter i diameter og avkjøl den tildekt i kjøleskap. Smør ei terteform på 22 centimeter i diameter med smør og dryss eit tynt lag mjøl i forma. Kjevle ut deigen til 4 millimeter tjukkleik og skjær ut ein sirkel med 28 centimeter i diameter på midten av deigen. Løft forsiktig, eller legg deigen rundt kjevlet, og dra den over til forma.

Artikkelen held fram under biletet.

ØKOLOGISK: Når sitronskalet blir brukt i mat, bør sitronane vere økologiske, altså verken voksa eller sprøyta.
ØKOLOGISK: Når sitronskalet blir brukt i mat, bør sitronane vere økologiske, altså verken voksa eller sprøyta.

Trykk deigen godt ned i kantane, og la det vere cirka 1 centimeter "overheng". Flikk på eventuelle hol med litt ekstra deig. Krøll bakepapiret slik at det ikkje er så stivt, og legg det over forma. Hell på 400 gram tørka erter og press dei ned med fingrane. No formar papiret seg etter botnen, og deigen skal "blindbakast" i omnen på 180 grader i cirka 20 minutt. Ta forma ut, løft av papiret og pensle deigen med litt piska eggekvite. Sett deigskalet inn igjen og steik i 5 minutt til det er heilt sprøtt og gyllent.

Senk omnen til 150 grader.

Fyll: Skyl sitronane og riv skalet fint. Hakk det rivne skalet opp litt ekstra med ein kniv. Du treng ei toppa matskei med skal, som du blandar med 175 gram (1,75 desiliter) sitronsaft. Visp egg, eggeplomme og sukker saman til sukkeret er oppløyst. Pisk fløyten til den er blitt til ein mjuk krem og rør den inn i eggedosisen. Bland dette forsiktig saman med ein visp. Hell i sitronjuice- og skalblandinga, og rør saman til ei jamn røre.

MELIS: Dryss over den avkjølte terta.
MELIS: Dryss over den avkjølte terta.

Fyll terteskalet med røra og set det i omnen i 40 minutt. Skubb litt på forma og sjå om den skvulpar, eller om den har "sett seg" i midten. Er den litt laus i midten, bakar du den vidare. Dette kan ta opptil 1 time, litt avhengig av kor varm omnen er og kor mange gonger du lukkar opp døra for å sjekke. Kvar gong du gjer det, blir temperaturen i omnen senka med cirka 20 grader.

Avkjøl kaka til romtemperatur og dryss på melis. Viss du vil, kan du brenne den av med ein skibrennar. Når den deretter får stå i 10 minutt, blir karamellaget mjukt igjen, og du kan skjere opp kaka i perfekte stykke med ein varm kniv.

Toasta pekannøtter: Dryss nøttene på eit brett og sett dei i omnen på 160 grader i 8 minutt.

(©NPK)

Til toppen