NY LEIAR: Vidar Vadseth frå Sogndal skal leia organisasjonen for norske fotballsupportarar.
NY LEIAR: Vidar Vadseth frå Sogndal skal leia organisasjonen for norske fotballsupportarar. (Foto: Privat)

Sogndøl skal leia fotballsupportarane i Norge

Vidar Vadseth frå Sogndal har i ei årrekkje vore leiar for dei opp mot 150 medlemmane i supportarklubben Saftkokaradn. No får han 35.000 til å halda styr på.

 Sogndal: I helga vart Vidar Vadseth valt til leiar i Norsk supportarallianse. Det er ein paraplyorganisasjon for alle supportarklubbane på toppnivåa i norsk fotball. Til saman famnar dei om 35.000 medlemmar.

– Det er kjekt, sjølvsagt, men det er ein stor jobb og nok å ta tak i, seier Vadseth, som er kjapp med å skryta av dei han har fått med seg i styret.

– Det er mange flinke folk rundt om i supporternorge, legg han til.

Trur rutinen vart avgjerande

Med under 150 betalande medlemmer er Saftkokaradn blant dei mindre supporterklubbane i norsk toppfotball. Likevel sit dei no altså med toppvervet nasjonalt.

Vadseth trur rutinen vart avgjerande for at hans kandidatur nådde heilt opp.

– Det gjer det litt lettare å komma i kontakt med dei rette instansane, når det er noko me vil lufta. I tillegg trur eg at eg er grei å prata med, og har fått høyra at eg har ein inkluderande leiarstil. Det får eg ta som eit kompliment, seier Vadseth.

Blant mange saker han vil kjempa for, er det å få på plass supportarkoordinatorar i norske klubbar. Dette er ein person som skal jobba tett mellom klubb og supportarar. I Sverige er det ikkje uvanleg at slike er tilsette i klubbane, og får løn i større eller mindre grad.

– Så langt er me ikkje komne i Norge, her er det mykje dugnad, seier han.

– Går på med krumma nakke

Vadseth håpar klubbane òg ser verdien av å få på plass ei tilsvarande rolle her i landet. 

– Me eit talerøyr og ei vaktbikkje overfor alle supportarane, og passar på at det er gode viklar for å driva supportarklubb, som igjen sørgar for god stemning og gode kampopplevingar på stadionar rundt om i Norge.

Vadseth har fått mykje merksemd for utspelet om at Sogndal Fotball bør dela av overskotet til resten av idretten i bygda. I rolla han har fått no, er det først og fremst vilkåra til norsk supportarkultur han skal kjempa for. Men leiaren ser ikkje vekk frå at han det kan dukka opp ein og annan fotballpolitisk kjepphest, òg på den nasjonale arenaen.

– Eg brenn voldsomt for dette, er positiv og går på med krumma nakke. Dette er noko eg gler meg til, seier Vadseth.

Til toppen