RYDDA: Trass store skader på vegen greidde entreprenøren å opna vegen som planlagt.
RYDDA: Trass store skader på vegen greidde entreprenøren å opna vegen som planlagt. (Foto: Porten.no-tipsar)

Vegen til Veitastrond er open att etter raset

Klokka 19.53 melder Statens vegvesen at oppryddingsarbeidet er ferdig.

Luster: Like etter klokka 14.00 fredag melde Statens vegvesen at eit steinras sperra vegen mellom Hafslo og Veitastrond ved Ugulsvik i Luster kommune.

– Det har gått eit ras like før klokka 13.00, med steinar store som bilar, sa Kjetil Løvås ved vegtrafikksentralen.

RAS: Det ligg fleire steinar i vegbana, i tillegg til dei som har rasa i vatnet på nedsida.  Foto: Statens vegvesen

Hildegunn Heggestad frå Veitastrond passerte rasstaden to timar før.

– Det låg det tre rimeleg store steinar i vegkanten. Dei sperra jo ikkje vegen, så eg køyrte forbi. Då reknar eg med at det har kome meir etter dei, seier ho.

Ein geolog vurderte rasstaden og gav grønt lys til å starta ryddinga av raset. Entreprenøren venta at vegen skulle vera opna til omlag klokka 20.00.

Den spådomen viste seg å stemma med fem minutts margin.

Det er ikkje mistanke om at bilar eller menneske er tekne av raset. Raset vart observert av arbeiderar i området.

ØYDELAGT: Storesteinar landa midt på vegen og tok med seg det meste av asfalten og autovernet. Foto: Oddbjørn Molland
Til toppen