Stoppar laksefisket tidleg i 54 vassdrag, fiske i Lærdalselvi får halde fram

Indre Sogn: Årsaka er lite fisk, skriv NRK, som først omtala saka. 

Line Fjellvær, fungerande avdelingsdirektør i Miljødirektoratet seier til avisa at å stoppe fisket tidleg er er eit tiltak for å sikra nok gytefisk i elvane til hausten.

– Vedtaket er gjort på bakgrunn av fangsttal, teljingar og vurderingar frå lokalt hald, seier Sturla Brørs, seniorrådgjevar i Miljødirektoratet.

Laksefisket vert stoppa 17. august i staden for 31.august. Det vil råka totalt 54 vassdrag i blant andre Balestrand, Høyanger, Leikanger, Luster, Lærdal, Sogndal, Vik og Årdal kommune.

Lærdalselva er unnateke vedtaket. Det er òg Mørkridselva, Sogndalselva og Vikjaelva. 

• Les òg: Fisket i Lærdal har starta verre enn fjorårets katastrofesesong

Dårleg start på sesongen

Sjølv om fisket starta i rimeleg tid denne sesongen, har det ikkje vore den heilt store fangsten å få. I mellom veke 22 og 25 i år blei 55 fisk blitt landa, mot 228 i same vekene i 2017.  

– Det har kome litt fisk heile vegen, men ikkje store mengder, sa leiar Ola Petter Bøe i Lærdal elveeigarlag, då. 

Bøe har ikkje vore tilgjengeleg på telefon for kommentar tysdag.