HAVSMAK: Blekksprutblekk og kamskjel skaper bølgjer i pastaretten denne veka. FOTO: Carl Martin Nordby / NPK.
HAVSMAK: Blekksprutblekk og kamskjel skaper bølgjer i pastaretten denne veka. FOTO: Carl Martin Nordby / NPK.

Svart frå havet

Ein av dei mest fascinerande skapningane på kloten bidrar med både smak, farge og stemning utan å sjølv vere til stades på tallerkenen.

Måten blekkspruten, med alle armane sine, er skrudd saman på. Måten han fangar byttedyra på. Og ikkje minst måten han forsvarer seg på, ved å farge vatnet rundt seg med svart blekk for å så stikke av!

Alt dette er så imponerande kreativt at vi forstår at det må ha tatt fleire millionar år å utvikle vidunderet.

PEN PASTA: Nattsvart pasta kjem ut av maskina.
PEN PASTA: Nattsvart pasta kjem ut av maskina.

Blekket som sprutast ut, ligg i ein pose inne i blekkspruten der det er konsentrert ned til ein fast, leireaktig masse. Dette vatnast ut inni blekkspruten før det vert skote ut som ei svær, kolsvart sky. Slik blir dei angripande fiskane finta ut, og i ly av skya rekk blekkspruten å stikke av og kamuflere seg på botnen.

Det er dette blekket det handlar om i retten denne veka. Når den norske blekkspruten – akkaren – reinsast, vert blekkposen sortert ut for sal i fiskediskane. Og har dei det ikkje, kan det bestillast. Dette er haldbart i årevis i frysaren!

Når blekket vert tilsett i ein heilt ordinær pastadeig, får pastaen ein mild smak av hav og ein heilt crazy svart utsjånad.

Den svarte pastaen fungerer aller best til fisk og skaldyr. For eksempel handplukka ferske norske kamskjel. Pannesteikt kamskjel med timian og kvitløk er nydeleg saman med pastaen og den raude, lett spicy, grove, søtaktige paprikasausen. Når paprikaen grillast/bakast i omn, mister han råsmaken og ein harmonisk søtsmak kjem fram. Konsistensen blir også mjuk og saftig etter 10 sekund med stavmiksaren.

Det blir litt overkill å servere pizza til pasta, men eit lite sprøtt «pizzabrød» er aldri feil. Enkelt laga – med litt riven parmesan, salt, pepar, tynne tomatskiver og rikeleg med ein god olivenolje før steiking – blir dette «knaset» i ein elles mjuk og god rett.

Artikkelen held fram under biletet.

TYNN PIZZA: Blir knasande godt tilhøyr.
TYNN PIZZA: Blir knasande godt tilhøyr.

Framgangsmåte

Blekkpasta: Bland egga med vatn, salt og blekk. Rør godt saman og bland inn mjølet, gjerne med kjøkkenmaskin. Dei to siste to minutta må du kna deigen for hand og justere med meir mjøl viss han er litt klissete/seig. La deigen kvile i kjøleskap 20 minutt før du køyrer han ut på pastamaskinen.

Del deigen i to og køyr deigen gjennom på tjukkaste innstilling. Brett plata saman og gjenta dette to-tre gonger. No blir plata meir og meir kompakt og hard. Det er fint. Køyr til slutt ut plata på tagliatellerullen til maskina – eller dryss mjøl på plata, rull han saman til ein rull og skjær han i strimlar på 5– 7 mm. Løft opp pastaen og rist av det meste av mjølet. Rett før servering kokast pastaen i lettsalta vatn til han flyt opp, det tar 2 min.

SVIDD: Brent paprika smakar meir.
SVIDD: Brent paprika smakar meir.

Paprikasaus: Sett omnen på 230 grader og grillfunksjon. I ei eldfast form leggjast ein heil chili, to paprika delt i to med skinnsida opp, fire uskrelte kvitløksfedd, to skrelte sjalottløkar som er delt i fire. Sprinkle 1 ss olivenolje over. Sett forma i omn i 15– 20 min slik at paprikaen ser svidd ut og skalet bles seg opp. Ta ut forma og la det avkjølast eit kvarters tid. Fjern skal og steinar frå paprika og chili. Klem ut innmaten av kvitløken (kast skalet). Køyr dette, pluss soltørka tomat, til ein grov saus med stavmiksar. Smak til med salt og ein liten skvis sitronsaft. Hell sausen over nykokt pasta og server umiddelbart.

Kamskjel: Reins ut kamskjelmuskelen. Varm opp ei panne og ha i solsikkeoljen. Legg kamskjela med snittflata ned og la dei liggje til dei har fått ei fin gyllen steikeskorpe. Trekk panna til side og tilsett smør, kvitløk og timian. Snu skjela og la dei trekke eit minutt før du delar dei i to eller fire og vender dei i den gode steikesjya. Dryss kamskjela over pastaen.

Pizzabrød: Kjevle ut deigen til 5 millimeter tynne botnar. Legg dei på ei supervarm omnsplate og topp dei med litt riven parmesan, salt, pepar, ei og anna tynn tomatskive og olivenolje. Steik på grillfunksjon til brødet blir sprøtt. Knekk eller skjær opp i bitar. (©NPK)

Til toppen