HERREKLYPP: Svenske David Rezo starta denne veka opp ein dedikert herrefrisør i Sogndal.
HERREKLYPP: Svenske David Rezo starta denne veka opp ein dedikert herrefrisør i Sogndal. (Foto: Halvor Farsund Storvik)

Svensken skulle berre besøka ein kompis – flytta til Sogndal for å starta herrefrisør

Måndag opna David Rezo dørene til den nyoppussa salongen i Fjøra.

Sogndal: – Eg likar meg veldig godt i naturen, og tykte det var veldig fint her, så eg bestemte meg for å flytta hit, seier David Rezo, som kjem frå Helsingborg.

Det var etter eit besøk hos barndomskameraten, som no driv spisestaden Den gamle nabo i Sogndal, at svensken fann ut at han òg ville starta opp ei verksemd her.

– No skal eg kjøpa meg ei hytte, for eg er glad i å stå på ski, seier han.

PUSSA OPP:  Det kosta opp mot 300.000 kroner å forvandla dei gamle butikklokala om til frisørsalong.  Foto: Halvor Farsund Storvik

Aggressiv prising

Måndag opna Rezo dørene til den første dedikerte herrefrisøren i Sogndal. Her kan du få fiksa både sveisen og trimma skjegget.

Rezo har bra tru på at han skal lukkast i Sogn.

– Eg er flink til å klyppa, ikkje for å skryta, men eg har 26 års erfaring, og har hatt fleire salongar i Sverige. Om ein skal samanlikna prisane, så burde det funka, seier Rezo.

Han trur studentane kan bli ei viktig kundegruppe. Plasseringa rett overfor Meieriet skulle såleis passa perfekt.

HÅPEFULL: David Rezo håpar skryt frå nøgde kundar skal setta fart på forretninga.  Foto: Halvor Farsund Storvik

Det ligg derimot ikkje djupe tankar bak valet om å sikta seg inn på herrane. 

– Eg kan ikkje klyppa damer. Det er herrefrisør eg er utdanna som, seier Rezo.

Satsar på jungeltelegrafen

Det kostar å starta frå null. Frisørentreprenøren reknar med at han har investert opptil 300.000 kroner i utstyr og opprusting av lokala.

– Me har gjort om på alt, alle veggar og det elektriske er bytt ut, det kostar. Det var ganske «risigt» her i byrjinga, seier Rezo.

Rett etter opning er det ei utfordring at dei færraste har fått med seg det nye tilbodet. Rezo har i første rekkje tenkt å bruka sosiale media til å marknadsføra seg. Men han håpar òg på gratishjelp.

– Den beste reklamen er når kunden blir nøgd. Då går jungeltelegrafen, seier han.

Til toppen