FORSVARTE TITTELEN: Tor Erik Moen frå Årdal forsvarte Klubbmeisterskap-tittelen frå i fjor og vann årets turnering suverent.
FORSVARTE TITTELEN: Tor Erik Moen frå Årdal forsvarte Klubbmeisterskap-tittelen frå i fjor og vann årets turnering suverent. (Bilde: Lærdal Golfklubb)

Totto med suveren siger i klubbmeisterskapen

Tor Erik Moen forsvarte tittelen frå i fjor.

Lærdal: Klubbmeisterskapen i Lærdal Golfklubb vert rekna som den gjævaste turneringa. Moen, som er regjerande meister, hadde få problem med å forsvare tittelen frå i fjor.

Med 140 slag fordelt over to dagar med 18 hol per dag, hadde årdølen eit forsprang til nummer to som vart Tore Gjerdalen med 162 slag.

– Det vart ganske suverent til slutt. Det var ikkje så mange som presterte på dagen, så eg hadde ikkje rekna med det då eg reiste utover laurdag, seier Moen.

– Kjekkare med nerver

Totalt deltok 20 golfarar på turneringa. Sjølv om dei hadde håpa på litt fleire, var det moro, seier han.

– Men eg hadde håpa på litt meir konkurranse. Det er kjekkare når det blir nerver og føler du må prestera. Uansett er det moro å vinna.

Etter dag éin leia Moen med ti slag til nestemann. Til slutt var det altså 22 slag som skilte han og resten. 

Godt miljø

Han fortel om eit godt golfmiljø i Indre Sogn. Sjølv prøvde han ut sporten for nokre år tilbake og vart fullstendig hekta.

– Det trur eg alle som har prøvd blir. Det er mange nye som er på veg oppover no. I fjor var det ein del nybyrjarar, seier han.

Sjå fleire bilete frå turneringa på Facebook-sida til Lærdal Golfklubb under.

Til toppen