Årdal: Fastkøyringa skjedde like etter klokka 19:00 tysdag i Fardalsvegen mellom Øvre Årdal og Fardalen. Den utanlandske traileren sperra heile vegen, og bilbergar vart tilkalla.
– Den står heilt fast i ein sving, fortalde operasjonsleiar Terje Magnussen i politiet.
Tindevegen har ein døgntrafikk på rundt 400 køyretøy.
SISTE: Vegen vart opna att 09:20, opplyser Tindevegen på eigne Facebook-sider.
Klokka 01:11 natt til onsdag melde vegtrafikksentralen at trafikken igjen kunne passera staden. Ein knapp time seinare kom kontrabeskjeden.
– Klokka 02:00 melde politiet inn til oss at køyretøyet hadde klart å køyra seg fast igjen lenger oppe. Denne gongen treng dei hjelp av ein annan type bergingsbil, og dette kan ikkje skje før på føremiddagen, fortel John Andreas Omdal på vegtrafikksentralen onsdag morgon.
Trassa skilt
Sjåføren som sette seg fast hadde trassa skilt ved inngangen av vegen som forbyr køyretøy over ti meter.
Frank Eldegard, dagleg leiar i Tindevegen, var på staden etter fastkøyringa.
– No har me studert ståa, og det ser ikkje bra ut. Me skal gjera det me kan for å opna vegen att til i morgon, men kan ikkje lova noko, sa Eldegard då.
Onsdag opplyser han på e-post at vegen aldri vart opna i natt.
– Traileren fekk me laus og snudd, men han sette seg fast att like etter, skriv han.
Heilt fri og på vegen att var traileren først like etter klokka 09:00.
