Trening + mat = sant

Trening + mat = sant

Veit du eigentleg kva mat du bør få i deg i samband med trening?

Maten du får i deg har mykje å seie for kva resultat du oppnår på trening. Her kjem nokre tips til korleis du kan ete for å bli sterkare, raskare og sprekare.

Før trening:

Du bør ete eit godt måltid 2-3 timar i forkant av økta, og det bør hovudsakleg bestå av karbohydrat og protein. Hugs også på å få i deg væske! Eksempel på kva du kan ete er:

  • ​Grovt brød med proteinrikt pålegg som egg, ost eller kjøt
  • Havregraut med ei tilsatt proteinkilde (proteinpulver, melk, kesam, egg, cottage cheese etc.), toppa med bær eller nøtter
  • Kjøt, kylling eller fisk med potet, ris eller fullkornspasta

Havregraut toppa med cottage cheese og peanøttsmør

Det er imidlertid ikkje i alle tilfelle du rekk eit skikkeleg måltid i forkant av treningsøkta. Innta da eit lite mellommåltid før du går i gang:

  • 1 skyr med frukt eller bær
  • 1 proteinbar
  • 1 scoop proteinpulver iblanda vatn eller melk som "pålegg" på eit par riskaker eller speltlomper

Riskaker med "proteinsjokoladepålegg" og banan
 

Undervegs:

Det er ikkje alltid nødvendig å ete eller drikke noko spesielt undervegs i ei treningsøkt,  men du bør sørge for å få i deg vatn under alle økter som varar over 30 minuttar, spesielt under uthaldstrening. Under lengre økter, gjerne på over 1-1,5 time, så er det lurt å tilføre kroppen litt karbohydrat slik at den har noko å gå på:

  • Sportsdrikk eller ein sportsbar som inneheld karbohydrat
  • Frukt (Banan, epler, bær, rosiner etc.)
     

Etter trening:

Treningsøkta er faktisk ikkje over før du har fylt opp energilagera dine igjen! Dersom du trenar meir enn gjennomsnittet (tung trening og meir enn 4 økter i veka) er det spesielt viktig at du får i deg eit lite måltid beståande av karbohydrat og protein innan 30 minuttar etter økta. Måltidet kan gjerne sjå ut som eksempela på mellommåltid, og hugs også å drikke godt med vatn eller melk. Dersom du trenar mykje uthaldsstrening kan du med fordel fokusere meir på å få i deg karbohydrat enn protein i ettertreningsmåltidet.

Innan 1-2 timar etter treningsøkta bør du også få i deg eit større måltid. Dette bør bestå av cirka 0,2 gram protein og 1 gram karbohydrat per kg kroppsvekt (for ein person på 70 kg blir det 14 gram protein og 70 gram karbohydrat). Her gjeld det same som tidlegare nevnt, fordelinga vil variere etter kva type trening du driv med. Ein middag beståande av kjøt, kylling eller fisk med grønnsaker og potet, pasta eller ris er eit godt eksempel på eit måltid som tilfører kroppen dei næringsstoffa den treng etter ei treningsøkt. Om du ikkje trenar rett før middag, men tidlegare eller seinare på dagen kan du prøve nokon av mine personlege favorittar:

  • 1 boks cottage cheese med 2 epler, kanel og sukrin
  • Proteinsjokoladepålegg (1 scoop proteinpulver iblanda vatn eller melk) på speltlomper
  • Gresk yoghurt iblanda vaniljeproteinpulver (valgfritt) toppa med havregryn, bær eller frukt
  • Proteinrøre av proteinpulver, 1 ss kakaopulver, nokon dropar stevia og havregryn iblanda vatn
     

 

Til toppen