GODE RESULTAT: Eirik Kinserdal og Hide Asperheim vann begge klassane sine under Nibberittet. Begge syklar for Sogn Cykleklubb. Privat foto
GODE RESULTAT: Eirik Kinserdal og Hide Asperheim vann begge klassane sine under Nibberittet. Begge syklar for Sogn Cykleklubb. Privat foto

Vann klassane sine i Nibberittet

Eirik Kinserdal og Hilde Asperheim klatra seg opp 1500 høgdemeter til Dalsnibba på sykkelseta - med godt resultat.

Årdal: – Eg er nøgd. Dette er eit ritt eg har hatt lyst til å delta på lenge, så eg melde meg på i siste liten ettersom vérmeldingane var så gode, seier Hilde Asperheim.

– Likar meg i bakkane

Ho vann klassa si, kvinner 40-49 år og kom totalt på 6.plass blant kvinnene som deltok i Nibberittet laurdag. Her klatrar syklistane 1500 høgdemeter over 21 kilometer frå Geiranger sentrum til toppen av fjellet Dalsnibba.

– Eg visste ikkje heilt korleis løypeprofilen var ettersom eg ikkje har vore med før. Dei siste fem kilometrane var det svært bratt og tungt. Men eg likar meg no i motbakkane, fortel Asperheim.

Ein annan årdøl som vann klassa si var Eirik Kinserdal. Han vann klasse gutar 17-19 år og kom totalt på 11.plass blant herreryttarane. Asperheim er imponert over Kinserdal:

– Eirik får svært god fart oppover. Han satsar, medan eg syklar mest for moro. Så er det artig å delta på nokre ritt ettersom eg brukar så mykje tid på trening som eg gjer. 

Artikkelen held fram etter biletet

KLAR: Eirik Kinserdal er klar for Nibberittet. Privat foto
KLAR: Eirik Kinserdal er klar for Nibberittet. Privat foto

– Formen ikkje heilt på topp

Kinserdal sjølv er vesentleg meir beskjeden:

– Det var heilt middels. Eg er ikkje supernøgd, men greitt nok.

– Er du ein klatrar som likar deg i slike motbakkar?

– Eg likar bakkar, men først og fremst når eg er i form. Den er ikkje heilt på topp no.

Det unge sykkeltalentet frå Årdal fortel han satsar på å trena godt i sommar og få til ein formtopp mot haustparten.

– Målet er å prestera jamt bra. No er det NM i landevegssykling neste veke. Deretter blir det ein liten pause før eg deltek i dei siste noregscupane i august og september. Der håpar eg å prestera bra.

I tillegg vann årdølen Geir Grindedal klasse menn 50-54 år i Nibbeløpet, som er eit halvmaraton og motbakkeløp i same løypa som sykkelrittet.

Til toppen