LAKSEVAFFEL: Villaks gir vaffelen nye dimensjoner. FOTO: Carl Martin Nordby /
LAKSEVAFFEL: Villaks gir vaffelen nye dimensjoner. FOTO: Carl Martin Nordby /

Vill vaffel

Confitbaking i smør gjer villaksen saftig og heilt klar for vaffel.

Vaffeljernet er rett og slett ei genial oppfinning: to svært varme metallelement som steikjer like fort frå begge sider. Dette jernet gir mange fleire moglegheiter enn den klassiske vaffelen med syltetøy og rømme. Eit slags vaffelfellesskap har faktisk utvikla seg på internett dei siste åra, der folk frå heile verda deler oppskrifter på røstipoteter, omelettar, toastar, kotelettar og spicy vaflar.

Vaffeljernet kjem, så vidt meg kjent, i to grunnutgåver: den velkjente flate plata med 5 hjarter som lager tynne vaflar, og den lubne belgiske varianten med store fordjupingar som gir tjukkare vaflar med større moglegheit for å proppe i godt fyll. Denne oppskrifta kan lagast på begge typar jern, men gå for det belgiske jernet dersom du har.

Artikkelen held fram under bilete

GI JERNET: Begge typer vaffeljern kan brukes i oppskriften, men det belgiske passer aller best.
GI JERNET: Begge typer vaffeljern kan brukes i oppskriften, men det belgiske passer aller best.

Vår belgiske vaffel er mjuk, salt, saftig og laga med litt mandelpotet. Eigenskapar som er midt i blinken for å matche den confiterte villaksen. Villaks vert rekna som ein feit fisk, men han er verkeleg ikkje i nærleiken av oppdrettslaksen verken i farge, feittprosent, konsistens eller smak. Han er i ein heilt eigen eliteklasse.

Dei aller fleste villaksar som vert dregne opp av hav og elvar, vert av naturlege grunnar frosne inn. Dette gjer fisken meir sårbar for å bli tørr etter varmebehandling viss ein ikkje tar det litt piano. Så ein bra metode er å sukkersalte fisken lett før confitbakinga. Confitbaking høyrest komplisert ut, men det betyr berre at laksen er bakt i feitt, i dette tilfelle den aller beste vennen til laksen, meierismør og steikt sjalottløk. Denne tillagingsmetoden gir fiskekjøtet ei roleg oppvarming, saftig konsistens og utruleg god smak.

Artikkelen held fram under bilete

BAKEPAPIR: Legges oppå fisken mens den trekker.
BAKEPAPIR: Legges oppå fisken mens den trekker.

Når fisken er klar, kan han brytast opp i bitar og leggjast oppå rømmen. For å få eit komplett smaksbilete bør det vere litt syre inne i bildet. Eit par skiver knasande agurk som har lege i ein sursøtsalt lake nokre minutt, gir laksen og rømmen eit velkjent kompani.

Viss villaksen har rogn, kan denne skylast, saltast og danderast på toppen. Viss ikkje finst det plenty med lakserogn eller løynrom å få kjøpt i butikken. Rogna, saman med nokre skogsyrer, gjer vaffelen ekstra vakker.

(UNDERSAK/OPPSKRIFT) Belgisk vaffel med confitbakt villaks
Ingrediensar (8-10 belgiske vaflar)

1 ts. bakepulver

1 ts. salt

120 gram rømme

500 gram mandelpotet (blir 400 gram most potet)

70 gram mjøl

4 egg

– --

100 gram rømme

4 ss løynrom/lakserogn

1 neve skogsyre

400 gram villaks

2 ts. flaksast

1 ts. sukker

250 gram smør

3 sjalottløk

2 dillkvistar (valfritt)

– --

1/4 agurk

2 ss eddik

1 ts. salt

1 ss sukker

1/2 desiliter vatn

Framgangsmåte

Villaks: Fjern skinn og bein frå laksen. Dryss på salt og sukker minst ein time før confitbakinga. Skrell løken og skjær han i ringar. Bruk ei passande panne/kjele og steik løken i ei skei smør til han luktar riktig godt. Ha på resten av smøret og smelt det. Legg laksen i smøret og bruk bakepapir som lokk heilt ned til fisken. Sett kjelen på låg varme slik at fisken trekkjer i smøret til han blir cirka 45 grader i kjernen og byrjar å flake seg. Løft fisken over på ein tallerken og bryt han opp i fine store bitar. Legg lune bitar på rømmen, dryss over skogsyra og rogna.

Belgisk vaffel: Skrell og kok mandelpotetene møre. Hell av vatnet gjennom ein grov sil eller dørslag. Press poteten gjennom silen slik at dei største klumpane vert knuste. No sit du truleg igjen med cirka 400 gram most potet. Bland poteten med dei andre vaffelingrediensane med ein visp. Steik røra i smurt vaffeljern som er maks oppvarma. Eg smør jernet med rikeleg av smøret som laksen blei bakt i.

Sure agurkar: Rør saman vatn, salt, sukker og eddik. Skiv agurken i 2– 3 millimeter skiver og legg i laken. La dei liggje ein times tid. Dei kan godt liggje over natta i kjøleskap også. (©NPK)

Til toppen