Elbil-auken krev føreseieleg ladestruktur

I vinterferien skjedde det att. Ladesystemet for el-bilar i Årdal var ute av funksjon. Ein fortvila situasjon når fleire og fleire ynskjer å køyra miljøvenleg.

Eg forstår sjølvsagt at innbyggjarane i Årdal ordnar seg med eigne løysingar og lading heime, men: Ei bygd som tek mål av seg til å satsa på reiseliv, lukkast med reiseliv og auka talet på turistar, må ha eit betre tilbod.

Mange kjem ned frå fjellet for å nytta det etterkvart mangfoldige tilbodet bygdi har å by på. Då må folk få lada bilane sine. Vegen opp Ljoteli eller over Turtagrø, krev tilstrekkeleg med straum på bilbatteria.

Eg er temmeleg lei av å bli fortalt at marknaden skal styra. Eg kjenner til svært få aktørar som brukar kapitalen sin på å ta samfunnsansvar i grisgrendte strok, utan å få betalt for det. Dette må løysast i fellesskap.

Det er tredje gongen på relativt kort tid eg opplever å møta ladestasjonen i Årdal ute av drift.

Eg ynskjer at Årdal skal vera ein tilgjengeleg kommune, med ein ladeinfrastruktur som fungerer. Omstilling og utvikling kan de. Eg oppmodar aktørane i Årdal (både offentlege og private) til å satsa. Gå saman for å utvikla eit ladetilbod i tråd med forventningane frå brukarane.

Lukke til.